«Gremmı» syılyǵynyń ıegeri Imanbek Zeıkenov (DJ Imanbek) atom stansıasynyń dybysymen jańa trek shyǵardy
DJ Imanbek-tiń «AtomSound» derekti kınojobasy men treginiń premerasy bıylǵy 17 maýsym kúni Sankt-Peterbýrg Halyqaralyq ekonomıkalyq forýmy (SQEF-2023) aıasynda ótti.
Joba Lenıngrad atom elektr stansıasynda túsirilgen.
«AtomSound» jobasy – bul álemde teńdesi joq «atom dybysy» men mýzykalyq aspaptardy aralastyrý tájirıbesi, sondaı-aq ınjenerıany, ıadrolyq fızıka negizderin jáne mýzykany organıkalyq túrde biriktirgen dybystar fızıkasyna arnalǵan derekti fılm. Onyń basty keıipkeri – DJ Imanbek. Túsirilim jumys istep turǵan Atom stansıasynda ótti. Sondaı-aq DJ imanbek-tiń biregeı tregi fılmniń fınalynda oryndalady.
Baspasóz máslıhaty barysynda qatysýshylar «atomdyq dybystardyń» – sempldardyń únemi tolyqtyrylyp otyratyn kitaphanasyn qurý jáne ony qoǵamdyq paıdalanýǵa berý jospary týraly aıtty. Jobanyń kelesi kezeńi – óz trekterin jasaý kezinde osy sempldardy paıdalanatyn mýzykanttar úshin úlken baıqaý uıymdastyrý. Jeńimpazdardy quramyna DJ Imanbek kiretin qazylar alqasy tańdaıdy.
DJ Imanbek «AtomSound» jobasynda jumys isteý prosesti uıymdastyrý turǵysynan eń qyzyqty joba bolǵanyn atap ótti.
«Maǵan birde mynadaı oı keldi: dybys – bul atomdar terbelisi. Jáne dybystyń tabıǵatyn zertteýge qyzyǵýshylyǵym oıandy. Fılmniń tujyrymdamasyn jasap bolǵannan keıin Rosatomǵa hat jazdym. Biraq bul ıdeıany tez júzege asyrýǵa bolatynyna senim az edi. Jaýap kelesi kúni-aq keldi: bizge Lenıngrad stansıasynda túsirilim jasaý usynyldy», – dep bólisti mýzykant.
Jobany iske asyrý kezinde týyndaǵan qıyndyqtardy talqylaý barysynda «Rosatom» memlekettik korporasıasy komýnıkasıalar departamenti dırektorynyń mindetin atqarýshy Andreı Tımonov atom elektr stansıalary men ıadrolyq tehnologıalarǵa búgingi qoǵamnyń saqtyqpen qaraıtyndyǵyn aıta ketti. Jáne bul taqyryptaǵy kóptegen shablondar mádenı ónimder arqyly beriledi: kıno, mýzyka, kompúterlik oıyndar. Sonymen qatar memlekettik korporasıalar konservatıvti búrokratıalyq mashınalar dep sanalady.