Arý Almatynyń mádenı ómiriniń ajyramas bólshegine aınalyp, tańdamaly týyndylarymen kórermenderiniń júreginen oryn alǵan Ǵ.Músirepov atyndaǵy memlekettik akademıalyq balalar men jasópirimder teatry bıyl ALǴASH ret Teatr maýsymyn taǵy bir aıǵa uzartyp otyr. Otandyq teatrlar syndy mamyr aıynda kórermenderimen «ýaqytsha» qoshtasatyn óner ujymy Almaty qalasynyń turǵyndary men qala qonaqtaryna rýhanı demalys syılaý úshin bıylǵy maýsymdy shilde aıynyń on jetinshi juldyzyna deıin jalǵastyrmaq.
Teatr óz repertýaryn jyl saıyn qazaq jáne álem ádebıetindegi ozyq dramatýrgıalyq shyǵarmalarmen tolyqtyryp, kórermenderin san qyrly keıipkerler bolmysymen tanystyrýda. Otandyq jáne sheteldik teatr festıválderinde keńinen tanylyp júrgen «Qulager» (avt.: İ.Jansúrgiov, rej.: F.Moldaǵalıev), máńgilik mahabbat jyry «Mahabbat qyzyq mol jyldar» (avt.: Á.Nurshaıyqov, rej.: F.Moldaǵalıev), adamdar men janýarlar arasyndaǵy meıirim men adaldyqty arqaý etken «Qara shekpen» (avt.: G.Hýgaev, rej.: A.Maemırov) syndy spektáklder turaqty kórermenderin taýyp, ár qoıylym kórsetilimi erekshe baǵalaýǵa ıe bolýda. Teatr men kórermen arasyndaǵy názik ıirimderge toly baılanystyń ajyramaýy úshin baryn salatyn óner ordasy kishkentaı kórermenderine jaǵymdy jańalyqtary men tosyn syılaryn daıyndaýda.
«... Teatr degen nárse ermek emes, ol – úlgi, ol – tárbıe, óner orny» degen qazaq ádebıeti men óneriniń kórnekti ókili, qalamger J.Aımaýytov pikirin eskersek, kishkentaı býyn baldyrǵandarymyzdy jan-jaqty, rýhanı baı hám qıal-kókjıegi keń tulǵa bolýyna úles qosý da teatrdyń basty maqsattarynyń biri bolyp sanalady. Búginde teatr repertýary balalardan bastap barsha kórermenderdi tebirentetin adaldyq, mahabbat, dostyq, otbasy qundylyqtary taqyryptaryn tereń ashýmen qatar adam janynyń san qyrly qatparlaryna úńilip keledi.
Teatr óneri ómirdi qalaı súrý kerektigin úıretpeıdi. Ol izgilik pen mahabbat, zulymdyq pen qıanat sekildi qasıetterdiń aıyrmashylyǵyn kórsetedi. Zulymdyqtardy synaı otyryp, adamdarǵa izgilik jolyn kórsetedi ári sezindiredi. Osy syndy mindetterin mahabbatpen atqaratyn Músirepov teatry óziniń barsha kórermenderin taǵylymdy qoıylymdarynyń qadirli qonaǵy bolýǵa shaqyrady! Sizder úshin jalǵasatyn teatr maýsymyeyń qyzyqty qoıylymdarynan qapy qalmańyzdar!