Almatylyq dárigerler tuqym qýalaıtyn aýrýǵa shaldyqqan 9 balaǵa kúrdeli mıkrohırýrgıalyq operasıa jasady
Almatydaǵy №2 qalalyq klınıkalyq balalar aýrýhanasynda reseılik mıkrohırýrg Andreı Vaıtıngerdiń qatysýymen eki kúndik sheberlik klasy ótti, dep habarlaıdy Almaty-akshamy.kz QazAqparatqa silteme jasap.
Sheberlik klasy sheńberinde pasıentter bilikti dárigerlerlerden keńes aldy. Eń bastysy, mýkopolısaharıdoz aýrýymen aýyratyn 9 balaǵa mindetti áleýmettik medısınalyq saqtandyrý esebinen operasıa jasaldy.
Biregeı kúrdeli otalardy reseılik mamanmen birge №2 qalalyq klınıkalyq balalar aýrýhanasynyń travmatologıa jáne ortopedıa bólimshesi meńgerýshisi Erlan Sadyrbalın men balalar hırýrgi Uljan Soltanbekova jasady.
«Operasıalardyń bári shaǵyn ınvazıvti ádispen jasaldy. Arnaıy quraldardyń kómegimen jasalǵan hırýrgıalyq manıpýlásıa saýsaqtardyń qozǵalysyn qalpyna keltirýge múmkindik beredi. Biregeı operasıalardy jasaý arqyly biz de aldaǵy ýaqytta kádege jaraıtyn úlken tájirıbe jınaqtadyq», - dedi Erlan Sadyrbalın.
Mýkopolısaharıdoz – aǵzada glıkozamınoglıkandardyń jınaqtalýy saldarynan bolatyn tuqym qýalaıtyn aýrý. Dáneker tinderdi zaqymdaıtyn dert saldarynan júıke júıesi, kózi, ishki organdary men qımyl-qozǵalys apparatynyń jumysy buzylady. Mýkopolısaharıdoz - álemde 100 myń adamnyń 50-inde kezdesetin sırek (orfandyq) aýrý.
Esterińizge sala ketsek, Elimizde 18 jasqa deıingi balalar memleket tarapynan saqtandyrylady.