Ol fınalda chehıalyq Katerjına Sınákovamen bas júlde úshin talasty
Qazaqstannyń birinshi, álemniń 25-raketkasy Elena Rybakına Portoroj (Slovenıa) WTA 250 týrnıriniń fınalynda jeńilip qaldy, dep habarlaıdy Almaty-akshamy.kz QazAqparatqa silteme jasap.
Jarystyń úshinshi raketkasy bolyp tirkelgen qazaqstandyq tenısshi fınalda dúnıejúzilik reıtıńide 82-orynda turǵan chehıalyq Katerjına Sınákovamen bas júlde úshin talasty.
Birinshi partıada Rybakına qos breık jasap, 5:0 esebimen alǵa ketkenimen, Sınákovanyń tarazy basyn teńestirýine múmkindik berip qoıdy – 5:5. Birneshe set-poıntty da paıdalana almady. Degenmen taı-breıkte qarsylasyn tyǵyryqqa tireı bildi – 7:6 (7:4).
Ekinshi sette esep 3:3 bolǵan mezette qazaqstandyq sportshy breık jasaǵanymen, chehıalyq tenısshi sol boıda ese qaıyrdy – 4:4. Bul joly taı-breıkte Sınákova sátti oınady – 7:6 (7:5).
Úshinshi, sheshýshi sette K.Sınákova breıkpen alǵa ketti – 4:2. Sodan soń E.Rybakına esepti teńestirgenimen, chehıalyq oıynshy qaıta breık jasady. Aqyry ol machqa dop bergende, óz múmkindigin múlt jibergen joq – 6:4.
Úsh saǵatqa sozylǵan tartysty machta Elena 8 eıs jasap, 7 breık-poınttyń tórteýin paıdalandy. Qarsylasy 1 eıs, 5 breıkpen (9 breık-poınt) kózge tústi.
Buǵan deıin E.Rybakına segiz ret WTA dodalarynyń fınalyna shyǵyp, sonyń ekeýinde ǵana úzdik shyqqan edi.
Sonymen qatar E.Rybakınanyń bıyl Ýımbldon týrnıriniń chempıony atanǵany belgili.
Eske sala keteıik, budan buryn Anna Danılınanyń Chehıadaǵy jarystyń jeńimpazy atanǵanyn, Elena Rybakınanyń Slovenıadaǵy týrnırdiń fınalyna shyqqanyn jazǵan bolatynbyz.
Sondaı-aq tenısshi Jibek Qulambaeva bıylǵy besinshi tıtýlyna qol jetkizdi.