Qazaqstanda bes jylda 2 mlrd aǵash otyrǵyzý josparlanyp otyr
Bıylǵy aǵash otyrǵyzý maýsymyn bastaǵan almatylyq jýrnalıser qala irgesindegi "Qazaq orman ornalastyrý kásiporny" RMQK-ne qarasty "Mejdýrechensk" óndiristik bólimshesinde qyrym qaraǵaıynyń kóshetterin otyrǵyzyp, kógaldandyrý jumystaryna óz úlesterin qosty, dep habarlaıdy Almaty-akshamy.kz.
QR EGTRM Orman sharýashylyǵy jáne janýarlar dúnıesi komıtetiniń uıymdastyrýymen ótken bul shara Halyqaralyq orman kúnine oraılastyryldy.
Komıtettiń baspasóz qyzmetiniń ókili Maqsat Nasyrdyń aıtýynsha, Qazaqstan Respýblıkasynyń Prezıdenti Qasym-Jomart Toqaevtyń 2020 jylǵy Joldaýyna sáıkes, 2021-2025 jyldary 843,0 myń ga alqapqa 2 mlrd aǵash otyrǵyzý josparlanǵan.
Kók jelektiń basym bóligi Túrkistan, Qyzylorda, Jambyl oblystarynyń, sondaı-aq Semeı jáne Ertis ormany rezervatynyń aýmaqtarynda otyrǵyzylmaq.