Abaı atyndaǵy QazUPÝ-da salıqaly jastaǵy adamdarǵa arnalǵan ýnıversıtet – «Kúmis ýnıversıtetiniń» ashylý saltanaty ótti.
Fılologıa ınstıtýtynyń uıymdastyrýymen «Múmkindikter alańy» taqyrybynda arnaıy is-shara ótkizildi. 2023 jyldyń qarasha aıynda bastalǵan bul joba Almaty qalasynyń Medeý jáne Alataý aýdandarynyń ákimdikterimen birlesip júzege asyrylýda.
İs-sharanyń maqsaty – egde azamattardyń bilim alý keńistigin keńeıtý, olardyń ómir súrý sapasyn arttyryp, ózin-ózi damytýyn qoldaý, qurmet kórsetý. Abaı ýnıversıtetiniń strategıalyq damý baǵdarlamasyna sáıkes Kúmis ýnıversıtet modelin júzege asyrý.
Bolat Tilep bul bastamanyń mańyzdylyǵyna jáne onyń ózektiligine toqtaldy.
«Búginde memleketimiz «Kúmis ýnıversıtet» jobasy aıasynda aǵa býyn ókilderiniń biliktiligin arttyryp, zaman talabyna saı damýy úshin biregeı múmkindikter usynyp otyr. Bilim berý salasynda kósh ilgeri kele jatqan bilim ordamyz aǵa býynǵa qoldaý kórsetip, olardyń ary qaraı úzdiksiz bilim alýyna, tájirıbe almasýyna yqpal etetin bolady. Biz aǵa býyn ókilderiniń ómir súrý sapasyn jaqsartýǵa jáne qoǵamdyq ómirge tolyqqandy qatysýyn qamtamasyz etýge baǵyttalǵan áleýmettik mańyzy bar jobalardy belsendi túrde júzege asyrýdy jalǵastyramyz», – dedi.
Atalǵan aýdandarda turatyn egde jastaǵy adamdarǵa arnalǵan til úırený kýrstaryn uıymdastyrý Fılologıa ınstıtýtynyń bastamasymen qolǵa alynǵan bolatyn. Qazirgi tańda qazaq, aǵylshyn jáne arab tilderin úırený kýrstaryna 56-ǵa jýyq adam qatysýda. Til úırený arqyly zamanǵa saı kommýnıkatıvtik daǵdylaryn arttyrýǵa qyzyǵýshylyq bildirgender sany kúnnen kúnge artyp keledi.