Qalanyń monıtorıńtik toptary ótken aptada 13 zańdy tulǵaǵa qatysty hattama toltyrdy
Almatyda tún ortasyna deıin Ashyq qosymshasynsyz jasyryn jumys istegen kásipkerlik nysany anyqtaldy, dep habarlaıdy Almaty-akshamy.kz Almaty.tv-ǵa silteme jasap.
Medeý aýdanynyń monıtorıńtik toby ádettegideı tekseriske shyǵyp, Sátpaev kóshesiniń boıynda ornalasqan túngi bardyń ústinen tústi. Mekeme saǵat tili túngi saǵat 00.00-den assa da, jumysyn toqtatpaı, kelýshilerdi shamadan tys artyq qabyldaǵan. Tipti, munda qorqor da shegilipti.
«Qurmetti kásipkerler, karantın talaptaryn buzbaı, sanıtarlyq normalardy saqtap jumys isteńizder. Qaýipti indettiń beti áli de qaıta qoıǵan joq. Adamdardyń densaýlyǵymen oınamaı, jaýapkershilikpen qaraıyq», – dedi Medeý aýdandyq Nur Otan partıasynyń ókili Nurjan Erdembekov.
Tekserýshi top ókilderi kóp uzamaı Tóle bı kóshesiniń boıynda ornalasqan dámhananyń da jumysyn áshkereledi. Kásipkerlik nysan osy ýaqytqa deıin Ashyq-qa qosylmaı, tún ortasyna deıin jasyryn jumys istep kelgen. Bas sanıtardyń qaýlysyna sáıkes, mobıldi qosymshasy joq mekemeler keshki 21.00-ge deıin ǵana adam qabyldaı alady. Keıin mamandar anyqtalǵan faktiler boıynsha kafe ıesi men kelýshilerge hattama toltyrdy.
«Medeý aýdanynda 4 monıtorıńtik top jumys isteıdi. Olar kúni-túni tekseris júrgizip, barlyq mekemeni baqylaýda ustap otyr. Ásirese, betperde rejımi, áleýmettik araqashyqtyq, merekelik jıyndarda sanıtarlyq talaptardyń saqtalýy qatań tekseriledi», – dedi Medeý aýdandyq kásipkerlikti jáne ónerkásipti damytý bóliminiń bas mamany Arman Saparov.
Aıta keteıik, Medeý aýdandyq monıtorıńtik toptary sońǵy aptada 300-den astam mekemede tekseris júrgizip, 13 zańdy tulǵaǵa hattama toltyrǵan.