Kardıologıa jáne ishki aýrýlar ǵylymı-zertteý ınstıtýtynda Basqarma tóraǵasy Rústem Tóleýtaevtiń jetekshiligimen anestezıologtar men kardıohırýrgtar toby bıyl úshinshi júrek transplantasıasyn jasady.
Donorlyq júrekti alǵashqy ret transplantasıalaý klınıkada 2023 jyly júrgizilgen bolatyn. Búgingi kúni barlyǵy 4 transplantasıa jasaldy.
Donor – Almatynyń Ortalyq qalalyq klınıkalyq aýrýhanasyna túsken 63 jastaǵy áıel adam, dárigerler mı ólimin tirkegen.
Júrek 36 jastaǵy almatylyq er adamǵa salyndy. Ol dılatasıalyq kardıomıopatıa, sol jaq qarynsha qýysynda tromb, shyǵarylý fraksıasy óte tómen (24%) sozylmaly júrek qyzmetiniń jetkiliksizdigine shaldyqqan. Emdeý nátıje bermegen soń, oǵan kardıoverter-defıbrıllátor ımplantasıalanǵan jáne júrek transplantasıasyna úmitkerler tizimine engizilgen.
«Ókinishke qaraı, sońǵy kezeńdegi sozylmaly júrek qyzmetiniń jetkiliksizdigine shaldyqqan naýqastar sany jyldan jylǵa artyp keledi. Alaıda donorlyq organdardyń tapshylyǵyna baılanysty júrekke muqtaj barlyq naýqastarǵa transplantasıa jasaý múmkin bolmaı otyr. Bizdiń pasıentke uzaq kútýdiń qajeti bolmady – sáıkes donor tabyldy. Osy kúrdeli úderisti uıymdastyrý jáne úılestirý isinde úlken qoldaý kórsetken Respýblıkalyq transplantasıa jáne joǵary tehnologıalyq medısınalyq qyzmetterdi úılestirý ortalyǵyna jáne onyń basshysy Aıdar Kenjetaıulyna alǵysymyz sheksiz. Sońǵy jyldary Ortalyq elimizde transplantologıa qyzmetin damytý baǵytynda belsendi jumys atqaryp keledi. Sondaı-aq qaladaǵy medısınalyq uıymdardaǵy áriptesterimizge kómegi úshin, al donor otbasynyń parasatty sheshimi men ómirlerdi qutqarǵany úshin rızashylyǵymyzdy bildiremiz», – dedi klınıkanyń birinshi basshysy Rústem Tóleýtaev.
Kardıohırýrgıa bólimshesiniń meńgerýshisi Maqsat Jaqaevtyń aıtýynsha, júrek transplantasıasy – júrek qyzmeti jetkiliksizdiginiń sońǵy satysyndaǵy eń tıimdi emdeý ádisi. Bul operasıa basqa emdeý tásilderi nátıje bermeı, naýqastyń jaǵdaıy asa aýyr bolǵan kezde jasalady. Qazirgi ýaqytta pasıenttiń jaǵdaıy turaqty, oń dınamıka baıqalýda. Ol reanımasıa bólimshesinen profıldi bólimshege aýystyryldy. Endi oǵan tolyqqandy ómir súre alady.
Donor týystarynyń kelisiminiń arqasynda dárigerler 6 adamnyń ómirin saqtap qaldy. Júrekten bólek, birneshe mańyzdy músheler - baýyr, oń jáne sol búırek, eki kózdiń qabyǵy (rogovısa) transplantasıalandy.