12 jeltoqsan kúni saǵat 20:30-da Almaty qalasynyń Ortalyq stadıonynda ÝEFA Konferensıa lıgasy aıasynda «Astana» men «Chelsı» komandalarynyń fýtbol machy ótedi, dep habarlaıdy aqshamnews.kz.
Bıletter týraly aqparat
Bıletterge suranystyń joǵary bolýyna jáne alaıaqtardyń jalǵan bıletter satýynyń aldyn alý maqsatynda Almatynyń Sport basqarmasy jankúıerlerge Zakazbiletov.kz servısi arqyly bıletterdi aldyn ala satyp alýdy usynady. Deldaldardyń qyzmetine júginbeýińizdi ótinemiz. Spekýlásıa men qaıta satýdyń aldyn alý úshin satyp alynǵan bıletter jeke aty-jóni kórsetilgen túrde rásimdeledi jáne mach kúni elektrondyq poshtaǵa jiberiledi. Stadıon kasalarynan bıletterdi satyp alý múmkindigi bolmaıdy. Stadıonǵa kireberiste jankúıerlerden bılet pen bılettegi aty-jónniń sáıkestigi tekseriledi. Budan keıin jeke tekserý júrgizilip, bılettiń shynaıylyǵyn tekserý úshin shtrıh-kod skanerlenedi.
Joldardyń jabylýy týraly aqparat
Kirý kezinde keptelis bolmas úshin jankúıerlerge Ortalyq stadıonǵa erterek kelip, qoǵamdyq kólikterdi paıdalanýǵa keńes beriledi.
Fýtbol jankúıerlerine stadıonnyń esigi 18:00-de ashylady.
Kólik keptelisin boldyrmaý maqsatynda stadıonǵa jaqyn aýmaqtarda 12 jeltoqsan kúni saǵat 18:30-dan 00:00-ge deıin Abaı dańǵylynyń (Baıtursynov kóshesinen Muqanov kóshesine deıin) qozǵalysy shekteledi, Sátbaev kóshesi (Baıtursynov kóshesinen Baızaqov kóshesine deıin) tolyq jabylady. Jaqyn mańdaǵy kóshelerde patrúldik polısıa beketteri qoıylady.
Jankúıerlerge arnalǵan aqparat
12 jeltoqsan kúni qalada mınýs temperatýra bolady dep kútilýde, synap baǵanasy shamamen -11 gradýs. Sondyqtan jyly ári yńǵaıly kıim kıý kerek. Qaýipsizdik sharalaryna baılanysty stadıon aýmaǵyna termos alyp kirýge tyıym salynady. Jankúıerler úshin stadıon ishinde ystyq sýsyndar men jeńil taǵamdar satyp alýǵa bolatyn saýda núkteleri jumys isteıdi. Stadıon aınalasynda 60 bıodárethana, onyń ishinde múmkindigi shekteýli jandarǵa arnalǵan dárethanalar ornatylady.
Transfer týraly aqparat
Qala ákimdigi jankúıerlerdiń Ortalyq stadıonǵa jáne keri qaıtýyna qolaıly bolý úshin 8 tegin avtobýs marshrýtyn uıymdastyrady. Ár marshrýtqa 10 avtobýstan bólinedi. Jınalý núktelerin 2GIS servısi arqyly kórýge bolady:
• Qalqaman shaǵyn aýdany (№7 qalalyq aýrýhana aıaldamasy) – Ortalyq stadıon.
• Orbıta shaǵyn aýdany (Mustafın-Toraıǵyrov kósheleriniń qıylysy) – Ortalyq stadıon.
• Aınabulaq shaǵyn aýdany (Maqataev-Pavlodar kósheleriniń qıylysy) – Ortalyq stadıon.
• «Halyq Arena» aıaldamasy (soltústik baǵyt) – Ortalyq stadıon.
• Almaty-1 temirjol vokzaly aıaldamasy – Ortalyq stadıon.
• «Raıymbek batyr» metropolıten beketi – Ortalyq stadıon.
• Naýryzbaı aýdanynyń HQKO aıaldamasy – Ortalyq stadıon.
• Momyshuly-Móńke bı kósheleriniń qıylysy aıaldamasy – Ortalyq stadıon.
Avtobýstar saǵat 16:00-den bastap júre bastaıdy jáne tolýyna qaraı jolǵa shyǵady.
Jeke kólik ıeleri men qala turǵyndarynan ýaqytsha qolaısyzdyqqa túsinistikpen qarap, baǵytyn aldyn ala josparlaýdy suraımyz.