Qaladaǵy 25 kitaphana men birneshe mýzeıde Elorda kúnine arnalǵan is-sharalar ótedi.
Qazaqstanda 6 shildede memlekettik mereke — Astana kúni atap ótiledi. Osy kúnge oraı ótetin is-sharalar týraly qalalyq mádenıet basqarmasy basshysynyń orynbasary Danıar Álıev pen Qazaqstan halqy Assambleıasy Almaty qalasy boıynsha tóraǵasynyń orynbasary Nurıa Nıazova aıtyp berdi, dep habarlaıdy Almaty-akshamy.kz.
Spıkerlerdiń aıtýynsha, bıyl karantınge baılanysty kóptegen is-shara onlaın rejımde ótedi.
Mysaly, 6 shildede S.Muqanov pen Ǵ.Músirepovtiń ádebı-memorıaldyq mýzeı kesheninde «Astana ajary» kórmesi (onlaın) ótedi.
Sol kúni mýltımedıalyq dástúrli mýzyka ortalyǵynda «El tiregi – Elorda» semınary (onlaın) ótedi. Semınarda Nur-Sultan qalasynyń tarıhy, mádenıeti, damýy, sondaı-aq QR Tuńǵysh Prezıdenti – Elbasy N. Á. Nazarbaevtyń ómiri men jumysy týraly aıtylady.
«6 shildede saǵat 10.00-de oflaın rejıminde «Er Tóstik» spektakliniń premerasy ótedi. Al, keshki saǵat 18.00-de Qazaq radıosynyń «Arman álemi» merekelik radıospektakli ótedi», – dedi Almaty mádenıet basqarmasy basshysynyń orynbasary Danıar Álıev.
Onyń aıtýynsha, Almatydaǵy 25 kitaphana men birneshe mýzeıde Elorda kúnine arnalǵan is-sharalar ótedi. Sonymen qatar is-sharalardyń bir bóligi dombyra kúnine arnalady jáne qazaqstandyq estrada juldyzdary qatysady. Baǵdarlamalar otandyq telearnalarda kórsetiledi.
Sondaı-aq, Qazaqstan halqy Assambleıasynyń Almaty qalasy boıynsha tóraǵasynyń orynbasary Nurıa Nıazova turǵyndardy kele jatqan merekemen quttyqtady. Ol merekeni indetke baılanysty úıde, jaqyn adamdar arasynda atap ótý kerek ekenin aıtty.
«Rýhy bir halyqpyz, biz birge kez kelgen synaqty jeńemiz, ózińizge jáne jaqyndaryńyzǵa qamqor bolyńyz. Bul quttyqtaýlardy Qazaqstan halqy Assambleıasy atynan joldaımyn», – dedi Nurıa Nıazova.
QHA ókili Almaty jastarynyń elimizde Assambleıa qurý týraly bastama kótergen Qazaqstan Respýblıkasynyń Tuńǵysh Prezıdenti – Elbasy Nursultan Nazarbaev jarıalaǵan jobalardy qýana júzege asyryp jatqanyn atap ótti.
Aıta keterligi, Almatyda 37 qalalyq jáne 19 respýblıkalyq etnomádenı birlestik jumys isteıdi. Olardyń barlyǵy jyl saıyn Qazaqstan Respýblıkasynyń Astana kúnin atap ótedi. Bıyl Qazaqstan halqy Assambleıasy barlyq is-sharalardy onlaın formatta ótkizedi.