Saraptama taǵaıyndalǵan.
Qazaqstannyń prokýratýra mamandary bıznesmen Ramıl Mýhorápovtyń málimdemesin polısıa tekserip jatqanyn aıtty, dep habarlaıdy Almaty-akshamy.kz Inbusiness.kz silteme jasap.
Bas prokýrordyń orynbasary Áset Shyndalıev Chocofamily negizin qalaýshy Ramıl Mýhorápovtyń málimdemesine qatysty jýrnalıserdiń saýalyna jaýap bergen.
"Qazir, meniń bilýimshe, Almaty qalalyq İİD tekserý júrgizip jatyr. Saraptama taǵaıyndaldy. Onyń qorytyndysy boıynsha sheshim qabyldanady", – dedi Áset Shyndalıev.
Eske sala ketsek, kásipker Ramıl Mýhorápov Qazaqstanǵa kelgen reseıliktermen kezdesýinde qazaq tili týraly jaǵymsyz pikir aıtyp, eldiń ashý-yzasyna tıgen edi. Nátıjesinde kóptegen qazaqstandyqtar oǵan qatysy bar kompanıalardyń qyzmetin paıdalanýdan bas tartty. Qoǵam belsendileri ony jazalaýdy talap etti.