Saltanatty jaǵdaıda, barsha jeke quram aldynda erjúrek, qaısar azamat marapattaldy
Almaty polısıasy qoǵamdyq kólikte áıelge shabýyl jasaǵan adamdy ustaýǵa kómek kórsetken jas jigitti marapattady, dep habarlaıdy Almaty-akshamy.kz.
24 jastaǵy qala turǵyny Raıymbek Medetbek bir sátke oılanbastan avtobýsta qolynda pyshaǵy bar shabýyldaýshyǵa júgirgenin eske alady.
«Men qoǵamdyq kólikke otyrdym. Bir-eki aıaldamadan ótken soń erkek pen áıel otyrdy, keıin olar birdeńeni talqylap, urysa bastady. Sosyn aıqaıdy estidim. Basymdy kóterip qarasam, ol qyzdy uryp tastaǵan, sosyn qaıta-qaıta urdy. Men áreket ettim, er adamnyń qoly men basynan ustap aldym. Qyz qashyp úlgerdi, avtobýstyń aldyna qaraı júgirip shyqty», – dep esine túsirdi Raıymbek.
Mende qolaıly jaǵdaı boldy: men artqy jaǵynda turdym. Qorqynyshty sezinýge ýaqytym bolmady, dereý áreket etýim kerek boldy, – dedi ol.
Búgin, 8 tamyz Almaty qalasy Alataý aýdandyq PB-nyń sherýi alańynda saltanatty jaǵdaıda, barsha jeke quram aldynda erjúrek, qaısar azamat marapattaldy. Raıymbek Medetbek Almaty qalalyq Polısıa departamenti Jergilikti polısıa qyzmeti basqarmasy bastyǵynyń mindetin atqarýshy Dıas Dýanbekovtyń qolynan “Qazaqstan polısıasyna 30 jyl” medalimen jáne estelik syılyqpen marapattaldy.
«Almaty qalalyq İshki ister departamenti basshylyǵy men barlyq jeke quramy atynan kúdiktini ustaýǵa kómekteskenińiz úshin sizge zor alǵysymdy bildiremin. Quqyq qorǵaý organdaryna kómektesip, kórsetilgen belsendi azamattyq ustanymyńyz, qyraǵylyǵyńyz ben zeıindiligińiz úshin marapattaldyńyz. Qoǵam sizden úlgi alyp, qylmysqa qarsy shyǵyp, kez kelgen qoǵamǵa jat kórinisterge tózbeıtindigine jáne qylmyspen ymyrasyz kúreste shet qalmaıtynyna senimdimin. Tabys, zor densaýlyq, baqyt tileımiz», – dedi Dıas Dýanbekov.