Tóbeleske qatysýshylar ustaldy.
Áýejaıdyń avtoturaǵynda mas úsh er adam tóbelesti. Keıin olardyń biri bótelkeni syndyryp, kelgen polıseılerge qaraı júgirdi, dep habarlaıdy Almaty-akshamy.kz QazAqparatqa silteme jasap.
Onyń vıdeosy áleýmettik jelide tarap jatyr.
Almaty qalalyq polısıa departamentiniń málimetinshe, 26 shildede túngi saǵat bir shamasynda Almaty Halyqaralyq áýejaıy aýmaǵyndaǵy týrısik polısıa beketiniń quramyndaǵy polısıa qyzmetkerlerine er adam kelip, kólik turaǵynda tóbeles bolyp jatqanyn aıtqan.
«Aqparat rastaldy, anyqtalǵanyndaı, ishimdik ishken úsh er adam tóbelesip jatty. Olar polısıa qyzmetkerleriniń talabyna agresıamen jaýap berdi. Tóbelesýshilerdiń biri, buryn sottalǵan, 1994 jyly týǵan Ý. esimdi azamat syranyń shyny bótelkesin syndyryp, polıseıge qaraı júgirip, ony soqqyǵa jyqpaq boldy. Aýyr qylmystyń jolyn kesken tártip saqshysy qyzmettik qarýynan aspanǵa eskertý oq atty», - dep habarlady qalalyq polısıadan.
Nátıjesinde tóbeleske qatysýshylar ustaldy. Olar - Almaty jáne Túrkistan oblystarynyń turǵyndary. Ekeýi buryn adam tonaǵany jáne bótenniń múlkin urlaǵany úshin sotty bolǵan.
«Olardyń áreketi QK-niń 293-baby 2-bóligi – buzaqylyqpen saralanyp, qamaýǵa alyndy. Atalǵan derek boıynsha sotqa deıingi tergeý bastaldy»,- dep atap ótti vedomstvodan. Sonymen qatar, qyzmettik qarýdy qoldaný deregi boıynsha qyzmettik tekserý júrgiziletin bolady.