Almatyda muzyka, zamanauı óner, teatr jáne belsendí demalysty toǵystyratyn auqymdy qysqy qalalyq festıval – «Panfılovtaǵy Jańa jyl» bastaldy.
Joba megapolıstíń basty jańa jyldyq alańdarynyń bíríne aınalyp, 21 jeltoqsannan bastap Panfılov kóshesínde ótíp jatyr. Festıvaldíń ashyluy jas árí talantty dıdjeılerdí qoldauǵa arnalady.
21-30 jeltoqsan aralyǵynda mūnda DJ-marafon ótedí: íríkteuden ótken 15 qatysushy kún saıyn saǵat 17:00-den 22:00-ge deıín árqaısysy ekí saǵattyq setterín ūsynady. Baıqau qalalyq muzykanyń jańa tolqyny ókílderín bíríktíríp, úzdík qatysushylar festıval seríktesterínen syılyqtar men júldeler alady. Muzykalyq baǵdarlama Panfılov kóshesín ashyq aspan astyndaǵy jandy sahnaǵa aınaldyrady.
Muzykamen qatar festıvaldíń kórkemdík baǵyty da damymaq. 16 jeltoqsanda «Eko-shyrsha Almaty» baıqauynyń open-call kezeńí ayaqtalǵan bolatyn. Baıqauǵa mektep oqushylary, táuelsíz suretshíler, dızaınerler men shyǵarmashylyq ūjymdardan 30-dan astam ótíním tústí. Íríkteu nátıjesínde fınalǵa ótken 15 qatysushynyń jūmystary festıval ayasynda júzege asyrylyp, kópshílíkke ūsynylady. Ár fınalıstke qaıta óńdelgen jáne ekínshí rettík materıaldardan art-shyrsha jasau úshín 100 myń teńge kólemínde grant bólíngen.
Baıqau qorytyndysy men jeńímpazdar negízgí mereke kúnderí jarıyalanyp, úzdík avtorlar aqshalaı syılyqqa ıe bolady. Festıvaldíń eń mańyzdy kezeńí 27-28 jeltoqsanda ótedí. Būl kúnderí Panfılov kóshesínde úsh metrlík marıonetkalar, akterler jáne jaryq effektílerí qatysatyn ımmersıvtí teatrlandyrylǵan qoıylym kórsetíledí.
Shou Almatyǵa arnaıy jazylǵan jańa qalalyq ertegíge negízdelíp, kórermenderge keıípkerlermen tíkeleı qarym-qatynas ornatuǵa múmkíndík beredí. Qoıylym balalarǵa da, eresekterge de arnalǵan jáne jańa jyldyq baǵdarlamanyń eń áserlí oqıǵalarynyń bírí bolmaq. Sondaı-aq osy kúnderí festıval aumaǵynda qalalyq snow-park ashylyp, kórsetílímdík syrǵanaular men jarystar ūıymdastyrylady. Sonymen qatar jas muzykanttar baıqauy ótíp, jańa esímder men qalalyq qauymdastyqtardy qoldau jalǵasady.
Ūıymdastyrushylardyń aıtuynsha, «Panfılovtaǵy Jańa jyl» – būl kóshení merekelík bezendíru ǵana emes, mádenıet, ekologıya, muzyka jáne jandy qarym-qatynasty bíríktíretín zamanauı qalalyq dástúr qalyptastyruǵa baǵyttalǵan joba. Festıval Almaty tūrǵyndary men qonaqtary úshín Jańa jyl qarsańynda jaryqqa, qozǵalysqa jáne jańa qalalyq kóńíl kúıge toly ashyq keńístíkke aınalmaq.
