МӘМС: Алматыда сақтандыру есебінен ең көп қолданылатын консультативтік-диагностикалық қызметтер қандай?
2024 жылы алматылықтар МӘМС есебінен 1156 консультативтік-диагностикалық қызмет түрін пайдаланған. Осы жылдың 9 айында Медициналық сақтандыру қоры аталған қызметтерге 18,1 млрд теңге жұмсады, деп хабарлайды МСҚ Алматы қалалық филиалының баспасөз қызметі.
Хабарламаға сүйенсек, оңтүстік астанада жұртшылық арасында акушер-гинекологтарға деген сұраныс жоғары. Жүгінген халық санына шаққанда одан кейінгі орындарға офтальмолог, неврапотолог, хирург, оториноларинголог және эндокринолог мамандар жайғасқан.
МӘМС пакетінде тиреотропты гормон (ТТГ), D дәрумені, еркін тироксин (T4), жатыр мойнынан алынған материалды цитологиялық тексеру (ПАП-тест және гемокульт-тест) сынды зерттеулерге деген сұраныс жоғары.
Ал, ең қымбат анализ – геннің мутацияға ұшырау деңгейін анықтайтын KRAS анализі. ПЦР әдісімен жасалатын анализ ісік пайда болған тіннен алынады. Тест организмде глюкозаға толеранттылықтың қаншалықты бұзылғанын анықтап, қант диабетін клиникалық белгілер байқалмай тұрып ерте анықтауға көмектеседі. МӘМС пакетінде бұл анализ шамамен 108 мың теңге тұрады.
Консультативтік-диагностикалық қызметтер арасында ең қымбаты – MARS жасанды бауыр аппараты арқылы жасалатын альбуминді диализ, құны 2,1 млн теңге. Медициналық көмектің бұл түрі бауыр жеткіліксіздігімен ауыратын науқастарға көрсетіледі.
Компьютерлік диагностика арасындағы ең қымбаты – бір фотонды эмиссионды компьютерлік томография, құны 87 мың теңге.
Филиал сарапшыларының сөзіне сүйенсек, сақтандыру енгізілгелі бері КТ мен МРТ-ға деген сұраныс артқан. 2024 жылдың 9 айында 35 мың компьютерлік томография жасалған, оған Қор 594,8 млн теңге төледі. Сонымен қатар, 48 мың МРТ қызметі үшін 686,8 млн теңге төленген.
Ұсынылып отырған мәліметтер МСҚ Аналитика орталығынан алынды. Орталық медицина саласындағы ауқымды мәліметтерді жинақтап, анализ жасауға, тиімді шешімдер қабылдауға мүмкіндік береді. Бүгінгі күні Аналитика орталығы арқылы 500-ге жуық ауқымды көрсеткіш визуализацияланды. Power BI, Superset, QlikSense бағдарламаларының көмегімен 18 базадан мәлімет жинақталады. Бұл медицина саласында туындаған қауіп-қатерлерді саралап, медициналық қызмет сапасын жақсартуға мүмкіндік береді.