Қазақстан Премьер-лигасының басты ойыны — «Қайрат» пен «Астана» арасындағы кездесу тек еліміздің емес, шетелдік жанкүйерлердің де назарын өзіне аударған айтулы оқиғаға айналды.
26 қазан күні Алматының Орталық стадионында мыңдаған көрермен чемпиондық алтын тағдырын шешетін тартысты матчты тамашалау үшін бас қосты, - деп хабарлайды Aqshamnews.kz.
Орталық стадион қақпасына алғашқылардың бірі болып Өскеменнен келген 16 жастағы Тимур Мейрамғалиев жетті. Ол ата-анасы және інілерімен бірге арнайы осы матчқа ат басын бұрған.
— Бүгінгі ойынды өткізіп алу мүмкін емес. Елдің ең мықты екі клубы кездеседі, бұл біздің мақтанышымыз. Әсіресе, өзім қатарлы Сәтбаевтың ойынын асыға күтіп жүрмін. Бүкіл отбасымызбен «Қайратты» қолдаймыз. Мен сегіз жасымнан футбол ойнаймын, енді інілерім де айналыса бастады. Әкем де бұрын ойнаған, футбол біздің отбасылық дәстүріміз. Футболға бір рет ғашық болсаң, ол өмір бойы жалғасады, — дейді Тимур күлімсіреп.
Жанкүйерлер арасында «Қайратты» жай ғана команда емес, өмірінің бір бөлшегіне айналдырғандар да бар. Алматылық Данил Коркешко өз естелік бөлісті:
— «Қайрат» менің туған командам. Бұрын өзім де осы клубтың сапында ойнағанмын. Бұл жолы жеңіс күтемін, ең азы 3:0 есебімен аяқталсые. Биыл «Қайрат» тіпті «Реалмен» кездескен еді, енді басты мақсат — чемпион болу. Сонда бәлкім, келесі жолы «Барселона» сияқты әлемдік клубтар да келер. Өкінішке қарай, жарақат салдарынан ойнамаймын, бірақ жүрегім әрдайым командаммен бірге, — дейді ол.
Көрермендер арасында ағылшын жанкүйерлері де бар. Солардың бірі Манчестер қаласынан келген танымал блогер және StuntPegg атты YouTube-арнасының авторы Нив Петруцциелло.
— Қазақстан туралы жақында ғана естідім, бірақ бәрін өз көзіммен көру қызық болды. «Қайрат» жайлы көп оқыдым. Өзім футболмен тыныстайтын қала — Манчестерденмін. Білемін, бірнеше жыл бұрын «Манчестер Юнайтед» «Астанамен» ойнаған. Енді «Қайрат» пен «Астананың» ойынын көруге келдім, екеуі де өте мықты командалар, сондықтан ойын әсерлі болатыны анық, — деді Нив.
Қазақстан мен шетелден келген жанкүйерлерді біріктірген бұл матч елдегі спорт инфрақұрылымының дамуын және Алматының ірі спорттық орталық ретіндегі мәртебесін айқын көрсетті. Көрермендердің қолдауы ойынға ерекше рух пен атмосфера сыйлады. Осылайша, Алматы тағы да өз мәртебесін — Қазақстанның спорт астанасы екенін дәлелдеді.