Қаламыздағы Қабылдау үйінде көрнекті жазушы, мәдениеттанушы Мұрат Әуезовтің өмірден озғанына 40 күн толуына орай ас берілді.
Жиынға еліміздің әр өңірінен лауазымды тұлғалар, мемлекет және қоғам қайраткерлері, зиялы қауым өкілдері, жазушының туыстары мен әріптестері қатысты, деп хабарлайды Almaty-akshamy.kz
Қазақ мәдениеті мен әдебиетіне еңбегі сіңген жазушының қайтыс болуына қырық күн толуына орай өткен қонақасыда Мұрат Әуезовтің адами қасиеттері мен шығармашылығы туралы жүрекжарды естеліктер мен қимас сөздер айтылды.
Атап айтқанда, жазушы Дулат Исабеков, Қазақстан Жазушылар одағының төрағасы Мереке Құлкенов, Амантай қажы Хантемірұлы, т.б. жазушының көзін көрген, қызметтес болған қоғам зиялылары Мұрат Мұхтарұлының әдеби-рухани мұрасымен қатар қайраткерлігін де айтып өтті.
Еске алу жиыны ҚР Парламенті Сенатының төрағасы Мәулен Әшімбаевтің хатын оқудан басталды. Хатта Мұрат Әуезовтің Қазақстан мәдениеті мен тарихын сақтау мен дамытудағы орасан зор рөлі туралы жазылған.
«Мұрат Әуезов қазақ мәдениетіне, руханиятына дегдарлықты, даралық пен даналықты алып келген адам. Оқуы да, тоқуы да, ізденісі де ерекше болды. Ең бастысы, елі мен жерін, өзінің халқын сүюдің жарқын үлгісін көрсетіп кетті. Халқын бар болмысымен сүйді. Себебі, ол ұлы әкенің рухани мейірімін көрген адам. Өмір бақи сол мейірімді өз халқына жұмсады. «Жас тұлпар» деген атақты ұйым болды. Ол заманда мұндай ұйым құру жүйеге қарсы шығумен тең еді. Соның барлығы кешегі Алаштың рухымен өскенінің арқасы. Билікке де, басқаға да ешқашан мойымаған адам. Тек қана елге бар болмысымен, білімімен еңбек етті. Кейінгі 60-жылдардағы буын Мұрат Әуезов, Төлен Әбдік, т.б. аға буынның тәрбиесін көрдік. Мұрат Мұхтарұлының салған сара жолы ешқашан өшпейді. Қазақ барда оның ілімі жасай береді», - деді жазушы Қали Сәрсенбай.