Яссауи және Дастан көшелерінің қиылысында опырылған асфальттан соң Алматының Қала құрылысын бақылау басқармасы Достық шағынауданында инженерлік желілердің құрылыс нысандарына жоспардан тыс тексеріс жүргізді, - деп хабарлайды Aqshamnews.kz.
Техникалық қадағалау функцияларын жүзеге асырған «Алатау сапа құрылыс» ЖШС-не тиісті бақылау жүргізбегені үшін әкімшілік шаралар қолданылды. Тексеріс қорытындысы бойынша техникалық қадағалау өзіне қатысты қызметті дұрыс атқармағаны үшін аккредиттелу туралы куәлігінен айырылды.
Бұдан басқа, мердігер ұйым – «СПЕЦКОММУНСТРОЙ» ЖШС-не қатысты жобалық шешімдерден ауытқу және құрылыс саласындағы мемлекеттік нормативтердің талаптарын сақтамағаны үшін анықталған бұзушылықтарды жоюға нұсқама бере отырып, әкімшілік шаралар қабылданды.
Басқармада атап өткендей, қала әкімі Дархан Сатыбалды берген тапсырма аясында құрылыс-монтаж жұмыстарының өндірісіне бақылау күшейтілді. Алдыңгүні Әбіш Кекілбайұлы көшесінде кәріз желісін қайта жаңартуды жүргізген AsiaMax құрылыс компаниясының лицензиясынан айырылғаны туралы хабарланды.