Алматы әкімі Дархан Сатыбалды жасанды интеллект саласындағы жетекші қытайлық iFLYTEK компаниясының ТМД елдеріне арналған бас директоры Хан Минцзэ мырзамен кездесті, - деп хабарлайды Aqshamnews.kz.
Кездесу барысында компания өкілдері білім саласына арналған технологиялық шешімдерін таныстырды. Атап айтқанда, «мұғалім – машина – оқушы» қағидаты бойынша жұмыс істейтін виртуалды көмекшісі бар интерактивті тақталар мен планшеттер ұсынылды. Мұндай цифрлық шешімдер оқыту үдерісінің тиімділігін арттыруға және оқушылардың оқу материалын меңгеру деңгейін күшейтуге бағытталған.
Дархан Сатыбалды бұл бағытты дамытуға қызығушылық білдіріп, Қазақстан Республикасының Президенті Қасым-Жомарт Тоқаев «Жасанды интеллект дәуіріндегі Қазақстан: өзекті міндеттер және оларды цифрлық трансформация арқылы шешу» жолдауында жүктеген тапсырмалар аясында білім беру жүйесін жаңғырту, адами капиталды дамыту және білікті кадрлар даярлау бойынша белсенді жұмыс жүргізіліп жатқанын атап өтті. Сондай-ақ ол мектепке дейінгі тәрбие мен жалпы білім беруден бастап жоғары оқу орындары мен ғылымға дейін барлық деңгейде білім сапасы мен қолжетімділігін арттыру басымдық екенін айтты.
Кездесу қорытындысы бойынша Алматы әкімі iFLYTEK компаниясының тәжірибесін жан-жақты зерделеуді және ұсынылған шешімдерді отандық білім беру стандарттарына бейімдеу мүмкіндігін қарастыруды тапсырды.