7 مامىر — وتان قورعاۋشىلار كۇنى. بۇل كۇنى ءبىز ادەتتە اسكەري شەنى بار ەر ازاماتتاردى ەسكە الىپ، ساربازدارعا العىسىمىزدى بىلدىرەمىز. الايدا ەلدە شەن تاققان ارۋلار دا جەتەرلىك. قارۋلى كۇشتەر قاتارىندا جۇرگەن، سالانىڭ اۋىر جۇگىن كوتەرىپ جۇرگەن ايەل قانشا؟ ولاردىڭ اراسىندا گەنەرال بولعاندارى بار ما؟ تولىعىراق Aqshamnews.kz ماتەريالىندا.
قارۋلى كۇشتەردە قانشا ايەل قىزمەت ەتەدى؟
قورعانىس مينيسترلىگىنىڭ مالىمەتىنشە، ءقازىر قارۋلى كۇشتەردە 9 مىڭعا جۋىق ايەل قىزمەت ەتەدى. ونىڭ ىشىندە 32 پولكوۆنيك، 11 ايەل باسشىلىق لاۋازىمدا قىزمەت اتقارادى .
ايتا كەتەيىك، Global Firepower دەرەكتەرىنە سايكەس، 2025 جىلى قازاقستاننىڭ قارۋلى كۇشتەرىندە 110،000 اسكەري قىزمەتشى جانە 135،000 رەزەرۆتەگى پەرسونال بار.
دەمەك، بارلىق اسكەري قىزمەتكەرلەردىڭ شامامەن 8 پايىزى عانا ايەلدەر. ولار كوبىنە مەديسينا، لوگيستيكا، بايلانىس، تاربيە جۇمىسى سياقتى "ءداستۇرلى" باعىتتاردا قىزمەت ەتەدى. الايدا كەيىنگ جىلدارى وفيسەرلىك قۇرامدا دا ايەلدەردىڭ سانى ارتىپ كەلەدى.
قازاقستاندا گەنەرال شەنىن العان تۇڭعىش ايەل كىم؟
2013 جىلى 7 مامىردا، وتان قورعاۋشىلار كۇنىنە ارنالعان العاشقى اسكەري پاراد كەزىندە ساۋلە ايتپايەۆا گەنەرال اتاعىنا يە بولدى، وسىلايشا ەلىمىزدىڭ تاريحىنداعى العاشقى ايەل گەنەرال اتاندى.
ايتپايەۆا اقمولا وبلىسىنىڭ جاقسى اۋدانىندا دۇنيەگە كەلگەن. ءوزىنىڭ ەڭبەك جولىن جاقسى اۋداندىق پروكۋراتۋراسىنىڭ كەڭسە مەڭگەرۋشىسى بولۋدان باستاعان. جوعارى ءبىلىم العاننان كەيىن اۋداندىق پروكۋراتۋرانىڭ تاعىلىمداماشىسى بولۋدان باستاپ رەسپۋبليكالىق ۆەدومستۆولاردىڭ باسشىسى دەيىنگى لاۋازىمدىق ساتىدان وتكەن.
2018 جىلعى ماۋسىمدا ساۋلە ايتپايەۆا ق ر بالا قۇقىقتارى جونىندەگى ۋاكىل قىزمەتىنە تاعايىندالعان بولاتىن.
ول - ەرەن ەرلىگى ءۇشىن "قازاقستان رەسپۋبليكاسى پروكۋراتۋرا سالاسىنىڭ ۇزدىك قىزمەتشىسى" اتانعان، "داڭق" وردەنىنىڭ جانە وزگە دە مەملەكەتتىك ماراپاتتاردىڭ يەسى.
سۋرەت: prokuror.gov.kz
ەلىمىزدە جالپى قانشا گەنەرال بار؟
گەنەرال — بۇل قارۋلى كۇشتەر مەن كەيبىر قۇقىق قورعاۋ ورگاندارىنداعى ەڭ جوعارى شەندەردىڭ ءبىرى.
- قورعانىس مينيسترلىگىنىڭ مالىمەتىنشە، ءقازىر قازاقستان قارۋلى كۇشتەرىندە جوعارى وفيسەرلىك قۇرامدا 40 اسكەري قىزمەتكەر بار. ولاردىڭ قاتارىندا ءبىر گەنەرال-پولكوۆنيك، توعىز گەنەرال-لەيتەنانت جانە وتىز گەنەرال-مايور بار.
- سىبايلاس جەمقورلىققا قارسى قىزمەتتە 11 قىزمەتكەردە گەنەرال شەنى بار.
- توتەنشە جاعدايلار مينيسترلىگىندە جوعارى باسشىلىق قۇرامداعى بەس ادام جۇمىس ىستەيدى.
- پروكۋراتۋرا ورگاندارىندا 28 قىزمەتكەردە مەملەكەتتىك ادىلەت كەڭەسشىسى (گەنەرال شەنىنە بالامالى) اتاعى بار.
- ىشكى ىستەر مينيسترلىگى گەنەرال شەنىندەگى قىزمەتكەرلەردىڭ ناقتى سانىن حابارلاعان جوق. الايدا اشىق دەرەككوزدەرگە سۇيەنسەك، بىلتىر ءۇش، ال بيىل بەس ادام پوليسيا گەنەرال-مايورى شەنىن العان.