قازاقستان رەسپۋبليكاسىنىڭ پرەمەر-مينيسترى ءاليحان سمايىلوۆ «AMANAT» پارتياسى فراكسياسىنىڭ كەڭەيتىلگەن وتىرىسىنا قاتىسىپ جاتىر.
ول جيىن بارىسىندا پرەزيدەنتتىڭ بۇعان دەيىنگى جولداۋلارىنىڭ قالاي جۇزەگە اسىرىلىپ جاتقانىنا توقتالدى، دەپ حابارلايدى Almaty-akshamy.kz 24.kz-كە سىلتەمە جاساپ.
«مەملەكەت باسشىسىنىڭ جولداۋلارىن ىسكە اسىرۋ شەڭبەرىندە الەۋمەتتىك سالادا جۇيەلى شارالار قابىلداندى. جاڭا الەۋمەتتىك كودەكس ەڭگىزىلدى. ول ازاماتتاردى تۋعاننان باستاپ ەگدە جاسقا جەتكەنگە دەيىن الەۋمەتتىك قولداۋدى كوزدەيدى. بالالارى بار وتباسىلاردى الەۋمەتتىك قولداۋ ءۇشىن بالا كۇتىمى كەزەڭى 1،5 جاسقا دەيىن ۇلعايتىلدى. كوپ بالالى انالارعا بەرىلەتىن جاردەماقى ارتتى. بۇگىندە بۇل جاردەماقىنى 750 مىڭنان استام انا الادى»، – دەدى ۇكىمەت باسشىسى.
1 قىركۇيەكتەن باستاپ جالپى ءبىلىم بەرەتىن مەكتەپتەردىڭ 1-4ء-شى سىنىپتاعى بالالارى تەگىن تاماقتاندىرۋمەن قامتاماسىز ەتىلەدى.
«سونداي-اق، بيىل الەۋمەتتىك جاعىنان وسال وتباسىلاردان شىققان 97 مىڭ بالانىڭ بالاباقشالاردا تەگىن تاماقتانۋ ماسەلەسى شەشىلدى. وسىلايشا، مەملەكەت وسى ساناتتاعى بالالاردىڭ مەكتەپكە دەيىنگى ءبىلىم بەرۋ شىعىستارىن ءوز موينىنا الدى»، – دەدى ول.
مەملەكەت باسشىسىنىڭ تاپسىرماسى بويىنشا مۇگەدەكتىگى بار جانە اسىراۋشىسىنان ايىرىلعان ادامدارعا بەرىلەتىن الەۋمەتتىك جاردەماقى 23%-كە ارتتى.
«2 ميلليوننان استام زەينەتكەردىڭ زەينەتاقىسىن سارالاپ ارتتىرۋ جۇرگىزىلدى. بۇگىندە مەملەكەتتىڭ زەينەتاقى باعدارلاماسى بويىنشا شىعىستار 3 ترلن تەڭگەدەن اسادى. مەملەكەت باسشىسىنىڭ تاپسىرماسىنا سايكەس ايەلدەردىڭ زەينەت جاسى 2028 جىلعا دەيىن 61 جاس دەڭگەيىندە بەكتىلدى. وسىعان بايلانىستى زەينەتاقىعا ارنالعان شىعىستار 800 ملرد تەڭگەدەن استام قوسىمشا سومانى قۇرايدى»، – دەدى ءاليحان سمايىلوۆ.
بيىل ازاماتتارعا ءوز زەينەتاقى جيناقتارىن باسقارۋ قۇقىعى بەرىلدى.
«سالىمشىلار زەينەتاقى جيناقتارى سوماسىنىڭ 50%ء-ىن وزدەرى تاڭداعان جەكە باسقارۋشى كومپانيالارعا بەرە الادى. بۇدان باسقا، 1 ميلليوننان استام ادام زەينەتاقى جيناقتارىن تۇرعىن ءۇي جاعدايلارىن جاقسارتۋعا جانە ەمدەلۋگە پايدالاندى. بيىل باسىنان باستاپ ۇكىمەت وتباسىنىڭ سيفرلىق كارتاسىن ەنگىزدى. 500 مىڭنان استام قازاقستاندىققا پرواكتيۆتى الەۋمەتتىك قولداۋ كورسەتىلدى»، – دەدى ول.