الماتى قالاسىنىڭ اكىمى دارحان ساتىبالدىنىڭ توراعالىعىمەن جاڭا جىلداعى مەرەكە كۇندەرى قالا تىرشىلىگىن ۇزدىكسىز قامتاماسىز ەتۋگە جاۋاپتى كوممۋنالدىق جانە اپاتتىق قىزمەتتەردىڭ دايىندىعىنا ارنالعان كەڭەس ءوتتى. كەڭەستە سانيتارلىق جاعداي، تۇرعىن ءۇي قورىنىڭ، ينجەنەرلىك جەلىلەر مەن جەدەلساتى شارۋاشىلىعىنىڭ تۇراقتى جۇمىسى ماسەلەلەرىنە ەرەكشە نازار اۋدارىلدى.
مەرەكە كۇندەرى كوممۋنالدىق قىزمەتتەردىڭ جۇمىسى كۇشەيتىلەدى. 31 جەلتوقسان مەن 4 قاڭتار ارالىعىندا مەردىگەر ۇيىمدار مەن مامانداندىرىلعان ءموبيلدى بريگادالاردى تارتا وتىرىپ، تاۋلىك بويى كەزەكشىلىك ۇيىمداستىرىلادى. 1 قاڭتارعا قاراعان ءتۇنى قالانىڭ الاڭدارىندا، قوعامدىق كەڭىستىكتەردە، ساياباقتاردا، سكۆەرلەردە، اۋلالاردا جانە ادامدار كوپ جينالاتىن ورىنداردا، ونىڭ ىشىندە جاڭا جىلدىق شىرشا ورناتىلعان اۋماقتاردا، ساۋدا-ويىن-ساۋىق ورتالىقتارى مەن بازارلاردا كەشەندى تازالاۋ جۇمىستارى جۇرگىزىلەدى.
كوشە-جول جەلىسىن، اۋلا اۋماقتارىن، ساياباقتار مەن جۇرگىنشىلەر ايماقتارىن كۇتىپ ۇستاۋعا 2،7 مىڭنان استام جول جۇمىسشىسى جانە 1 مىڭنان اسا ارنايى تەحنيكا جۇمىلدىرىلادى. اۋا رايى قولايسىز بولعان جاعدايدا تەحنيكا مەن ادام رەسۋرستارىن قوسىمشا تارتۋ كوزدەلگەن. قوقىس جاشىكتەرى مەن كونتەينەر الاڭدارىنىڭ ۋاقىتىلى تازالانۋى، سونداي-اق تۇرمىستىق قاتتى قالدىقتاردىڭ شىعارىلۋى قاتاڭ باقىلاۋعا الىنادى.
تۇرعىن ءۇي قورىنىڭ تۇراقتى جۇمىسىن قامتاماسىز ەتۋ ءۇشىن سۋ، جىلۋ جانە ەلەكتر ەنەرگياسىنىڭ بەرىلۋىن باقىلايتىن، اپاتتىق قىزمەتتەردىڭ جۇمىسىن ۇيلەستىرەتىن جانە تۇرعىنداردىڭ وتىنىشتەرىن جەدەل قارايتىن تاۋلىك بويعى جەدەل ارەكەت ەتۋ شتابى ۇيىمداستىرىلدى. باسقارۋشى ۇيىمدارمەن ءوزارا ءىس-قيمىل قالانىڭ بارلىق اۋداندارىندا، ونىڭ ىشىندە جۇمىس چاتتارى ارقىلى جولعا قويىلعان. مەرەكە كۇندەرى اپاتتىق بريگادالاردىڭ كەزەكشىلىگى كۇشەيتىلىپ، جەدەلساتى شارۋاشىلىعىنىڭ ديسپەچەرلىك قىزمەتتەرى تاۋلىك بويى جۇمىس ىستەيدى.
كەڭەس قورىتىندىسى بويىنشا قالا اكىمى سالالىق باسقارمالار مەن مەردىگەر ۇيىمدار باسشىلارىنىڭ اتقارىلاتىن جۇمىستاردىڭ ساپاسى مەن ۋاقتىلى ورىندالۋىنا جەكە جاۋاپكەرشىلىگىن اتاپ ءوتىپ، جاڭا جىلداعى مەرەكە كۇندەرى كوممۋنالدىق قىزمەتتەردىڭ بارىنشا دايىن بولۋىن جانە بارلىق شتاتتان تىس جاعدايلارعا جەدەل ارەكەت ەتۋدى قامتاماسىز ەتۋدى تاپسىردى.