ادام ءومىرىنىڭ ۇشتەن ءبىر بولىگىن ۇيقىمەن وتكىزەدى.
دۇنيەجۇزىلىك ۇيقى كۇنى العاش رەت 2008 جىلى 14 ناۋرىزدا حالىقارالىق ۇيقى كوميتەتىنىڭ باستاماسىمەن ءوتتى. سودان بەرى جىل سايىن كوكتەمگى كۇن مەن ءتۇن تەڭەلەردىڭ الدىنداعى جۇما كۇنى اتالىپ كەلەدى، دەپ حابارلايدى Almaty-akshamy.kz Calend.ru-عا سىلتەمە جاساپ.
ۇيقى – اعزانىڭ ءومىر ءسۇرۋى ءۇشىن قاجەت ەرەكشە فورما. دۇرىس ۇيقى كەزىندە اعزا كۇنى بويى جۇمسالعان كۇشىن قالپىنا كەلتىرەدى، وسىلايشا «ءوزىن رەتكە كەلتىرەدى». سول سەبەپتى دە دەنى ساۋ ادام ۇيىقتاپ تۇرعاننان كەيىن تىنىققان ءارى جاڭادان كۇش جيناعانداي بولادى.
تەڭگەرىمدى تاماقتانۋ، كۇندەلىكتى رەجيمدى دۇرىس ۇيىمداستىرۋ، ۇيقىعا جەتكىلىكتى ۋاقىت ءبولۋ — كوپتەگەن جىلدار بويى فيزيكالىق جانە پسيحيكالىق دەنساۋلىقتى ساقتاۋ ءۇشىن قاجەتتى جاعدايلار.
ورتاشا العاندا، ءار ادام ءومىرىنىڭ ۇشتەن ءبىر بولىگى ۇيقىمەن وتەدى. ۇيقى كەزىندە بىزدە مي بەلسەندىلىگى تومەندەيدى جانە ونىڭ رەاكسياسى دا باسەڭ بولادى.
ۇزاق ۋاقىت بويى «ۇيقىنىڭ قانباي» ءجۇرۋى ادامنىڭ ءومىر ساپاسىنا اسەر ەتەدى: ءازىل-قالجىڭ ازايىپ، كوڭىل-كۇي جوعالادى، اشۋشاڭدىق پايدا بولادى، ادام وزىنەن ءوزى تۇيىقتالا باستايدى جانە ءبىر عانا ماسەلەگە شۇقشيا بەرەدى. نەبارى 4 ساعاتتىق ۇيقىنىڭ ازدىعى رەاكسيانى 45%-عا تومەندەتەدى. ەستە ساقتاۋ قابىلەتى ناشارلاپ، ءتۇرلى اۋرۋلاردىڭ اسقىنۋى مۇمكىن.
دارىگەرلەر ۇيقىنىڭ بۇزىلۋىن بولاشاق ينستۋلتتار، ينفاركتتار، گيپەرتونيا جانە باسقا دا كۇردەرى اۋرۋلاردىڭ بولۋىنا اكەلەتىن باسپالداق دەپ اتايدى. سونداي-اق دۇرىس ۇيقى - جۇرەك-قان تامىرلارى جانە باسقا دا اۋرۋلاردىڭ، سەمىزدىكتىڭ الدىن الۋدىڭ اسەر ەتە الاتىن ادىستەرىنىڭ ءبىرى. ۇيقى ميدىڭ بارلىق ارتىق ويلاردان ارىلۋى ءۇشىن نەيروندىق بايلانىستاردان كەرەكسىز اقۋىزداردى «تازالايدى».
ۇيقىنىڭ قانىق بولۋى ءۇشىن قاراپايىم ادىستەردى ۇستانسا جەتكىلىكتى. ەڭ الدىمەن، «ۇيقىنىڭ قانباي قالاتىن» كەزدەرىن جيناي بەرمەۋ كەرەك. ۇيىقتار الدىندا الكوگول جانە كوفەينى بار ونىمدەردى ىشپەگەن ءجون – ولار جۇيكە جۇيەسىنە كەرى اسەر ەتەدى. تاماققا تويىپ الىپ نەمەسە كەرىسىنشە ءىش قابىسىپ قالاتىنداي اش جاتۋ دا زياندى ەكەنى بەلگىلى. كەشكى تاماقتەن كەيىن جانە ۇيقىعا دەيىن شامامەن 4 ساعات ءوتۋ كەرەك.
الايدا، كوپ ۇيىقتاۋدىڭ دا زياندى تۇستارى بار. عالىمداردىڭ پايىمىنشا، ەرەسەك ادام ءۇشىن تاۋلىگىنە 7-8 ساعات ۇيىقتاۋ ەڭ جاقسى ءارى جەتكىلىكتى ۋاقىت. كەيبىر ماماندار ايەلدەرگە قوسىمشا ءبىر ساعات ۇيىقتاۋ ارتىق بولمايدى دەپ سانايدى. سەبەبى ولار ەموسياعا الدەقايدا بەرىلگىش كەلەدى. بالالاردىڭ اعزالارى قالىپتى جۇمىس ىستەۋى ءۇشىن تاۋلىگىنە كەمىندە 10 ساعاتتان از ۇيىقتاماۋ كەرەك.
بۇل كۇن ءوزىمىزدىڭ ۇيقىمىزعا تاعى ءبىر رەت ءمان بەرىپ، ياعني دەنساۋلىعىمىزعا دا كوڭىل بولۋگە سەبەپ بولار كۇندەردىڭ ءبىرى بولسىن. ۇيقىلارىڭىز قانىق، كوڭىلدەرىڭىز كوتەرىڭكى، دەندەرىڭىز ساۋ بولسىن!