پروفيلاكتيكالىق مەديسينا اكادەمياسىنىڭ پرەزيدەنتى، امەريكا دەنساۋلىق ساقتاۋ قاۋىمداستىعىنىڭ مۇشەسى الماز شارمان ۆاكسيناسيادان كەيىنگى جاناما اسەرلەردەن قورقۋ نايزاعايدان قورقىپ، جاۋىندى كۇنى كوشەگە شىقپاۋمەن بىردەي ارەكەت دەگەن وي ايتتى، دەپ حابارلايدى almaty-akshamy.kz قازاقپارات تىلشىسىنە سىلتەمە جاساپ.
«كوروناۆيرۋس - بۇگىندە الدىن الۋعا بولاتىن اۋرۋ. ۆاكسينا 100 پايىز بولماسا دا، كوروناۆيرۋس ينفەكسياسىنان، سىرقاتتىڭ اۋىر وتۋىنەن قورعايدى. بۇگىندە الەمدە ءتۇرلى ۆاكسينالاردىڭ 4 ملرد دوزاسى ەگىلدى. ارينە، ۆاكسينانىڭ ءوزى ۆيرۋس تۋدىرمايدى جانە ۆاكسينا العاندار ءىس جۇزىندە كوۆيدتەن ولمەيدى. ۆاكسينانى 100 پايىز ءقاۋىپسىز دەپ تە ايتا المايمىز. وتە سيرەك جاعدايلاردا ولار اللەرگيالىق رەاكسيا نەمەسە قاننىڭ ۇيۋى سياقتى جاناما اسەرلەردى تۋدىرۋى مۇمكىن. مۇنداي رەاكسيالار ۆاكسينا العان 50 مىڭ ادامنىڭ بىرەۋىندە عانا كەزدەسەدى. بۇل ىقتيمالدىلىقتى نايزاعاي ءتۇسۋى ىقتيمالدىعىمەن سالىستىرۋعا بولادى. بۇل وتە سيرەك كەزدەسەدى»، - دەپ ءتۇسىندىردى ساراپشى.
سونىمەن قاتار، ول ۆاكسينا الماعان ءار بەسىنشى ادام قان ۇيۋ قاۋپىنە شالدىعاتىنىن ايتتى.
«بۇل ءقاۋىپتىڭ ىقتيمالدىعى ۆاكسينا العاننان كەيىنگى ىقتيمالدىقتان مىڭ ەسە جوعارى. ۆاكسينالار جاڭا تۋعان نارەستەلەردە رەپرودۋكتيۆتىك اۋىتقۋلار مەن دەفورماسيالاردىڭ دامۋىنا اكەلمەيدى. كەرىسىنشە، كوۆيدپەن اۋىراتىندار بەدەۋلىكتىڭ، شالا تۋىلۋدىڭ، سونداي-اق ميدىڭ، جۇرەكتىڭ، باسقا ورگانداردىڭ سوزىلمالى سىرقاتىنىڭ، ونىڭ ىشىندە اقىل-وي قابىلەتىنىڭ تومەندەۋىنىڭ ۇلكەن قاۋپىنە ۇشىرايدى»، - دەدى الماز شارمان.