الماتىنىڭ پوليسياسى جازعى كانيكۋل كەزىندە بالالاردىڭ قاۋىپسىزدىگىن قامتاماسىز ەتەدى
الماتىنىڭ وڭىرلىك كوممۋنيكاسيالار قىزمەتىندە بالالاردىڭ جاز ماۋسىمىنداعى قاۋىپسىزدىگىنە ارنالعان پرەسس-كونفەرەنسيا بولىپ ءوتتى. وعان الماتىنىڭ پوليسيا دەپارتامەنتىنىڭ جەرگىلىكتى پوليسيا قىزمەتى باستىعىنىڭ ورىنباسارى ايتان ەلەۋسىزوۆ قاتىستى.
سپيكەردىڭ ايتۋىنشا، جازعى كانيكۋل كەزىندە، اسىرەسە قالالىق جەردە وقىس وقيعا ءقاۋپى ارتادى. الماتىدا وسىنداي جاعدايدىڭ الدىن الۋ ءۇشىن بىلتىردان بەرى مەكەمەلەر اراسىنداعى ىقپالداستىقتى ارتتىرىپ، قوعامدىق باقىلاۋدى كۇشەيتۋدى كوزدەيتىن ءىس-شارالار قولعا الىنعان.
«2024-2025 جىلدارى قابىلدانعان ءىس-شارالاردىڭ ارقاسىندا قاۋىپ-قاتەردى بارىنشا باسەڭدەتىپ، قالاداعى 266 مىڭنان استام بالانىڭ تولىققاندى دەمالۋىنا جاعداي جاسادىق»،- دەپ اتاپ ءوتتى ايتان ەلەۋسىزوۆ.
پوليسەيلەردىڭ تاعى ءبىر مىندەتى – جولداعى قاۋىپسىزدىكتى قامتاماسىز ەتۋ. جاز كەزىندە ولار جاس ينسپەكتورلارمەن بىرگە ويىن-ساۋىق مەكەمەلەرىن باقىلاپ، بالالار كوپ جۇرەتىن مەكتەپ، ساۋدا ورىندارى مەن ۆوكزال ماڭىن تەكسەرىپ، رەيد جاساعان.
«بالالار لاگەرى مەن دەمالىس ورىندارىنىڭ ءارقايسىسىندا بەكىتىلگەن ءبىر-بىر بولىمشە پوليسەيى مەن يۋۆەنالدى پوليسيا قىزمەتكەرى بار. ولار كەز كەلگەن جاعدايدا جىلدام قيمىلداپ، وقىس وقيعانىڭ الدىن الۋعا تىرىسادى،- دەدى ايتان ەلەۋسىزوۆ. بۋللينگ پەن كيبەربۋللينگتىڭ الدىن الىپ، جاسوسپىرىمدەر جاساعان نەمەسە جاسوسپىرىمدەرگە جاسالعان زاڭىز ارەكەتتىڭ جولىن كەسۋ دە پوليسيانىڭ مىندەتىنە كىرەدى.
جيىن بارىسىندا، جەرگىلىكتى پوليسيا قىزمەتى باستىعىنىڭ ورىنباسارى اتا-انالارعا ءوتىنىش جاسادى.
«اتا-انالار جاعى بالالارىنىڭ قايدا، قاي جەردە جۇرگەنىن قاداعالاپ، ولاردى ۇنەمى باقىلاپ وتىرۋى كەرەك. بالالارمەن بىرلەسىپ جول قاۋىپسىزدىگى ەرەجەسىن جاتتاپ، ءقاۋىپ تونگەندە ولارعا نە ىستەۋ كەرەك ەكەنىن ايتىڭىزدار. ەڭ باستىسى – بالاعا شۇعىل قىزمەتتىڭ 101، 102، 103 جانە 112 نومىرىنە قوڭىراۋ شالۋدى ۇيرەتىڭىز»،- دەپ تولىقتىردى ايتان ەلەۋسىزوۆ.
سونىمەن بىرگە، پوليسيا تەرەزەنى اشىق قالدىرۋدىڭ دا ءقاۋىپتى ەكەنىن ەسكەرتتى. تەرەزەگە تەمىر جاقتاۋ ورناتىپ، نەمەسە تەرەزەنى بالانىڭ قولى جەتە المايتىنداي ەتىپ جاساعان دۇرىس.
جيىننىڭ سوڭىنا قاراي، پوليسيا وكىلى بالانىڭ قاۋىپسىزدىگىنە ەڭ الدىمەن اتا-اناسى جاۋاپتى ەكەنىن تاعى ءبىر رەت ەسكە سالىپ، مەملەكەتتىك ورگاندار مەن ءبىلىم مەكەمەلەرىمەن بىرلەسىپ جۇمىس ىستەۋ ءقاۋىپتى ازايتۋعا عانا كومەكتەسەتىنىن ايتتى.