الماتى پوليسەيلەرى ۇرلانعان 5 ۇيالى تەلەفوندى يەلەرىنە قايتاردى.
بۇرىن حابارلانعانداي، الماتى پوليسياسى ۇرلانعان تەلەفونداردى ساتاتىن حالىقارالىق ارنانى توقتاتتى. ۇرلانعان تەلەفوندار بىشكەكتەن تابىلدى.
كريمينالدىق پوليسيا ۇرلانعان تەلەفونداردى ساتىپ الۋ جانە ودان ءارى ساتۋعا قاتىسى بار ادامدى اشكەرەلەۋ بويىنشا جۇرگىزىلگەن جەدەل ءىس-شارالاردىڭ ناتيجەسى ەكەندىگىن حابارلادى.
«ونىڭ ءوز تىزبەگى بولدى. پ.ەسىمدى ازامات قىرعىزستاندىق “ارىپتەسىمەن” ءوزارا ارەكەتتەسۋدى ورناتقان ءبىزدىڭ وتانداسىمىز وعان الماتىدا ۇرلانعان ۇيالى تەلەفونداردى جىبەرگەن، ونىڭ ورنىنا ول بىشكەك تۇرعىندارىنان ۇرلانعان گادجەتتەردى العان. قىرعىز رەسپۋبليكاسىنىڭ استاناسىنا جونەلتىلگەن جەدەل ۋاكىلدەر ول جەردەن قالامىزدا ۇرلانعان ءتۇرلى ۇلگىدەگى 278 ءموبيلدى قۇرىلعىنى الىپ كەلدى»، – دەدى الماتى قالالىق پد كريمينالدىق پوليسيا باسقارماسىنىڭ باستىعى قۋاتبەك ناۋاتوۆ.
قايتارىلعان ۇيالى تەلەفونداردى انىقتاۋ باسقارماسىنىڭ قىزمەتكەرلەرى الماتىدا تەرگەلىپ جاتقان قىلمىستىق ىستەرگە قاتىسى بار-جوعىنا تەكسەرىپ جاتىر.
«جاقىندا عانا بەس الماتى تۇرعىنىنا ۇرلانعان تەلەفوندارى قايتارىلدى. بەلگىلى بولعانداي، ولاردان ۇيالى تەلەفوندارىن قوعامدىق كولىكتەر مەن ايالدامالاردا ۇرلاپ كەتكەن. بۇل ازاماتتار، ادەتتە، ادامدار كوپ شوعىرلاناتىن ورىنداردا جۇرەتىن قالتا ۇرىلارىنىڭ قۇربانى بولدى. ءارقاشان ساق جانە قىراعى بولۋ ماڭىزدى»، – دەدى قۋاتبەك ناۋاتوۆ.