قاڭتار ايىنداعى وقيعالار كەزىندە زارداپ شەككەن بيزنەسكە قارجىلاي قولداۋدىڭ جالپى سوماسى 2 029 313 422 تەڭگەنى قۇرادى. بۇل تۋرالى الماتى وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسى بارىسىندا قالالىق كاسىپكەرلەر پالاتاسىنىڭ ديرەكتورى ايتۋار قوشمامبەتوۆ مالىمدەدى دەپ حابارلايدى almaty-akshamy.kz.
23 قاڭتار مەن 23 اقپان ارالىعىندا الماتىلىق كاسىپكەرلەر Infokazakstan.kz سايتىن پايدالانا وتىرىپ، 1 752 ءوتىنىم بەردى. كەيبىرەۋلەر وتىنىشتەرىن بىرنەشە رەت بەرگەن. سوندىقتان سايتتا قازىرگى ۋاقىتتا وتىنىمدەردىڭ جالپى سانى – 1 752. اقپارات قوڭىراۋ شالىپ، ناقتىلانعاننان كەيىن جالپى سوماسى 34 316 437 000 تەڭگەگە 1 413 كاسىپكەردىڭ زارداپ شەككەنى انىقتالدى.
«قازىرگى ۋاقىتتا كوميسسيا جالپى سوماسى 2 029 313 422 تەڭگەگە 755 ءوتىنىمدى قارادى، وندا مەملەكەتتىك بيۋدجەتتەن 1 274 398 461 تەڭگە سوماعا 379 ءوتىنىم قارجىلاندىرىلدى. قالعاندارى «جاڭا الاتاۋ» جانە «كۇش بىرلىكتە» قورلارىمەن قارجىلاندىرىلادى»، - دەپ حابارلادى ا. قوشمامبەتوۆ.
ماقۇلدانعان وتىنىمدەر اراسىندا ساۋدا سالاسى (زەرگەرلىك بۇيىمدار، ۇيالى تەلەفوندار، كيىم) – 310 ءوتىنىم، بيزنەس-ورتالىقتار – 36 ءوتىنىم، قوعامدىق تاماقتانۋ وبەكتىلەرى – 26 ءوتىنىم باسىم.
ايتۋار قوشمامبەتوۆ ق ر پرەزيدەنتىنىڭ شۇعىل كومەك كورسەتۋ جونىندەگى تاپسىرماسى اياسىندا بيزنەسكە شىعىننىڭ بارلىق ساناتتارى ءۇشىن 10 ملن تەڭگەگە دەيىنگى تولەم سوماسىمەن جەڭىلدەتىلگەن ەسەپ بويىنشا شىعىندى وتەۋدى جۇزەگە اسىرۋ، سونداي-اق «جابدىق» ساناتى ءۇشىن وڭايلاتىلعان تەتىكتى قولدانۋ جانە ادۆوكاتتاردىڭ قىزمەتتەرىنە اقى تولەۋدىڭ ورنىن تولتىرۋ ۇسىنىلعانىن اتاپ ءوتتى. بۇل شارالار وتىنىمدەردى قاراۋ مەرزىمىن ءبىر ايدان ەكى اپتاعا دەيىن قىسقارتۋعا مۇمكىندىك بەرەدى.