قوعامدىق باقىلاۋ كوميسسيا وكىلدەرى بارلىق مەكەمەگە كەدەرگىسىز بارا الادى
بۇل تۋرالى ق ر ءىىم قىلمىستىق-اتقارۋ جۇيەسى كوميتەتى ءتوراعاسىنىڭ ورىنباسارى مەيرام ايۋبايەۆ ق ر پرەزيدەنتى جانىنداعى وكق-دا وتكەن بريفينگتە ايتتى، دەپ حابارلايدى Almaty-akshamy.kz Baq.kz-كە سىلتەمە جاساپ.
«بۇگىنگى تاڭدا مۇنداي جاعدايدا 23 ادام بار، ونىڭ 21ء-ى الماتى قالاسىنىڭ №4 قالالىق كلينيكالىق اۋرۋحاناسىندا، اتىراۋ وبلىستىق جانە قىزىلوردا قالالىق اۋرۋحانالارىندا بىر-بىردەن. جاپپاي تارتىپسىزدىك بارىسىنداعى قىلمىستار ءۇشىن بارلىعى قىلمىستىق-اتقارۋ جۇيەسى مەكەمەلەرىنە 691 ادام جەتكىزىلدى، ونىڭ ىشىندە 16-سىنىڭ بۇلتارتپاۋ شاراسى ءۇيقاماققا الۋعا نەمەسە ەشقايدا كەتپەۋ تۋرالى قولحاتقا اۋىستىرىلدى»، - دەدى ول.
ايۋبايەۆ اتاعانداي، قازىرگى ۋاقىتتا تەرگەۋ يزولياتورلارىندا 675 ادام ۇستالۋدا.
«ۇلتتىق الدىن الۋ تەتىگى مەن قوعامدىق باقىلاۋ كوميسسيالارىنىڭ وكىلدەرى بارلىق مەكەمەگە كەدەرگىسىز بارا الاتىنىن اتاپ ءوتۋ قاجەت، بۇل رەتتە ادۆوكاتتاردى ءوز كليەنتتەرىنە جىبەرۋ جانە ساۋقاتتاردى بەرۋ شتاتتىق رەجيمدە جۇزەگە اسىرىلادى. ءىس جۇزىندە بارلىق ءوڭىر كوروناۆيرۋستىق ينفەكسيامەن اۋىرۋ دەڭگەيى بويىنشا «قىزىل ايماقتا» ورنالاسقانىن ەسكەرە وتىرىپ، سانيتاريالىق-ەپيدەميولوگيالىق شارالار قاتاڭ ساقتالادى»، - دەدى مەيرام ايۋبايەۆ.