الماتىدا وقۋشى ورنىنىڭ تاپشىلىعىن ازايتىپ، ءبىلىم بەرۋ مەكەمەلەرىن جاڭعىرتۋعا باعىتتالعان «كەلەشەك مەكتەپتەرى» مەن «1300 مەكتەپتى وڭالتۋ» ۇلتتىق جوباسى جۇيەلى تۇردە ىسكە اسىپ جاتىر. بيىل 1 قىركۇيەكتە قالادا 7 جاڭا مەكتەپ اشىلماق. وڭىرلىك كوممۋنيكاسيالار قىزمەتىندە وتكەن باسپا ءسوز كونفەرەنسياسىندا الماتى قالاسى ءبىلىم باسقارماسىنىڭ باسشىسى سايران سايفەدەنوۆ وسىلاي دەپ مالىمدەدى.
جالپى، «كەلەشەك مەكتەپتەرى» جوباسى اياسىندا 34،8 مىڭ وقۋشىعا ارنالعان 21 مەكتەپ سالىنىپ جاتىر. ونىڭ ىشىندە 13 مەكتەپ «Samruk-Kazyna Construction» كومپانياسىنىڭ قاتىسۋىمەن قولعا الىنعان. بىلتىر ءبىر مەكتەپ پايدالانۋعا بەرىلسە، جاڭا وقۋ جىلىنىڭ العاشقى كۇنى تاعى 7 مەكتەپ ەسىگىن اشادى. بۇدان بولەك، تامىز ايىنىڭ سوڭىنا دەيىن تاعى 5 مەكتەپتىڭ قۇرىلىسى اياقتالىپ، قىركۇيەكتە اشىلماق.
قوسىمشا 8 مەكتەپ جەكە ينۆەستورلاردىڭ قاتىسۋىمەن «ساتىپ الۋ» مەحانيزمى ارقىلى سالىنا باستادى. سونىڭ ىشىندە ەكى مەكتەپ بيىل قىركۇيەكتە ىسكە قوسىلادى. تاعى ەكى مەكتەپ 2025 جىلدىڭ جەلتوقسانىندا، قالعان تورتەۋى جىل سوڭىنا دەيىن اشىلماق.
«1300 مەكتەپتى وڭالتۋ» جوباسى اياسىندا 2025–2027 جىلدارعا ارنالعان الماتىداعى 31 ءبىلىم بەرۋ مەكەمەسىنىڭ ءتىزىمى جاساقتالدى. 2025 جىلى 15 مەكتەپتە، 2026 جىلى – 9، 2027 جىلى – 7 مەكتەپتە وسىنداي جۇمىس جوسپارلانعان. بەس نىساندا قۇرىلىس پەن قايتا جاڭارتۋ جۇمىسى ءجۇرىپ جاتىر. سونىمەن قاتار، جەرگىلىكتى بيۋدجەت ەسەبىنەن «زەردەلى» شاعىناۋدانىندا 550 ورىندىق مەكتەپ سالىنا باستادى. ناۋرىزباي اۋدانىندا 1200 ورىندىق جاڭا مەكتەپ ساتىپ الۋ جوسپارلانعان، ول 2025 جىلدىڭ سوڭىنا دەيىن قولدانىسقا بەرىلمەك.
قالادا قوسىمشا 3 مىڭنان استام وقۋشى ورنى قۇرىلاتىن 13 مەكتەپ پەن 8 قوسىمشا عيماراتتى سەيسميكالىق كۇشەيتۋ جانە قايتا قۇرۋ جۇمىستارى بەلسەندى ءجۇرىپ جاتىر. كەيبىر نىساندار تولىق جاڭارىپ ۇلگەردى. وقۋ جىلى باستالعانعا دەيىن تاعى 4 مەكتەپ پايدالانۋعا بەرىلىپ، جىل سوڭىنا دەيىن قوسىمشا 8 مەكتەپ اياقتالادى. قالعان 8 نىساننىڭ جۇمىسى 2026 جىلى جالعاسادى.
سونىمەن قاتار 8 بالاباقشا مەن ماشينا جاساۋ جانە تەلەكوممۋنيكاسيالار كوللەدجى كۇردەلى جوندەۋدەن ءوتىپ جاتىر. اعىمداعى جوندەۋ جۇمىستارى 188 مەكتەپتە، 48 بالاباقشادا، 15 كوللەدجدە، 7 ينتەرناتتا جانە قوسىمشا ءبىلىم بەرەتىن 4 مەكەمەدە اتقارىلىپ جاتىر. بۇل ماقساتقا 1،8 ملرد تەڭگە بولىنگەن.
ءبىلىم بەرۋ نىساندارىن جىلىتۋ ماۋسىمىنا دايارلاۋ جۇمىسى دا اياقتالىپ قالىد. 196 بالاباقشانىڭ 188ء-ى دايىندىق اكتىسىن الدى، قالعانى جوندەلىپ جاتىر. 216 مەكتەپتىڭ 203ء-ى دايىندىقتان وتسە، قالعانى جاقىن ارادا اياقتالادى. 20 كوللەدجدىڭ 19-ى دايىن، قوسىمشا ءبىلىم بەرەتىن 19 مەكەمەنىڭ 17ء-سى قىسقا تولىق ءازىر. بارلىق نىسان تامىز ايىنىڭ سوڭىنا دەيىن جىلىتۋ ماۋسىمىنا دايىن بولماق.
وسىلايشا، الماتى ساپالى دا ءقاۋىپسىز ءبىلىم بەرۋ ورتاسىن قالىپتاستىرىپ جاتىر. جاڭا مەكتەپتەردىڭ اشىلۋى مەن قولدانىستاعى مەكەمەلەردىڭ جاڭعىرتىلۋى قالاداعى مىڭداعان وقۋشىعا قولايلى جاعداي جاساماق.