Prezıdenttiń tapsyrmasy boıynsha Úkimet "Qazaqstan balalary" biryńǵaı tujyrymdamasyn qabyldady, - dep habarlaıdy aqshamnews.kz tilshisi.
"Búginde elimizde shamamen 7 mln bala ósip keledi. Iaǵnı, halyqtyń úshten bir bóliginen astamyn balalar qurap otyr, naqty aıtsaq – 34%. Elimizdiń bolashaǵy otanshyl, jasampaz urpaq tárbıesine tikeleı baılanysty. Sondyqtan da Memleket basshysy Ulttyq quryltaıda “Qazaqstan balalary” biryńǵaı tujyrymdamasyn ázirleýdi tapsyrdy, - dep atap ótti Oljas Bektenov Úkimet otyrysynda.
Úkimet otyrysynda jaýapty mınıstrler biryńǵaı Tujyrymdama jobasynyń negizgi tásilderi týraly baıandady.
"Qazaqstan balalary" tujyrymdamasynda bilim berý, densaýlyq saqtaý, qaýipsizdik, áleýmettik qamsyzdandyrý jáne otbasynyń ál-aýqaty salasynda balalardyń quqyqtaryn qorǵaý jónindegi naqty is-sharalar jospary qamtylǵan.
Premer-mınıstr keıingi jyldary balalardyń quqyqtaryn qorǵaý boıynsha birqatar shara qabyldanǵanyn atap ótti.
NE İSTELDİ?
- "Zańnamalyq baza aıtarlyqtaı keńeıtildi. Ásirese, balalarǵa qatysty qylmystyq áreketter úshin jazanyń bultartpas qaǵıdaty qatań saqtalady.
- Otbasy máseleleri, áıelder men balalardyń quqyqtaryn qorǵaý boıynsha 111 biryńǵaı baılanys ortalyǵy iske qosyldy. Oǵan júgingen jaǵdaıda mindetti túrde kómek kórsetilip, tekserý sharalary júrgiziledi.
- Barlyq óńirde bala quqyqtary jónindegi óńirlik ýákilder jumys isteıdi, olar bala quqyqtarynyń saqtalýyn baqylaıdy ári balalar men otbasylarǵa kómek kórsetedi.
- 1 aqpannan bastap barlyq bilim berý uıymyna "tosynnan tekserý" qaǵıdaty boıynsha erekshe baqylaý men qadaǵalaý júıesi engiziledi. Bul balalardy saýyqtyrý, olardyń qaýipsizdigi men tamaqtaný máselelerine qatysty". Oljas Bektenov Densaýlyq saqtaý, Oqý-aǵartý, Mádenıet, Eńbek jáne áleýmettik qorǵaý, Týrızm jáne İshki ister mınıstrlikterine ákimdiktermen birlesip, osy jyldyń 30 qańtaryna deıin erekshe baqylaý men qadaǵalaýǵa jatatyn nysandar tizilimin daıyndaýdy tapsyrdy.
- Balalardyń quqyqtaryn qorǵaý deńgeıin arttyrý maqsatynda qamqorshylyq organdary mamandarynyń jańa shtattyq normatıvi engizildi. Ol 1 jyl ishinde mamandar sanyn 3 eseden astam arttyrýǵa múmkindik berdi.
- Osy mamandar qatarynan ár óńirde bala quqyqtaryn qorǵaý basqarmalary qurylyp jatyr.
TÚITKİLDİ MÁSELELER:
"Keıingi jyldary balalardyń sapaly medısınalyq kómek alý múmkindigi aıtarlyqtaı jaqsardy. Alaıda, mamandardyń, dárilik zattardyń jetispeýshiligine, balalardy ońaltý máseleleri boıynsha túsip jatqan shaǵymdar az emes. Erekshe bilim berý qajettilikteri bar balalardy qoldaýdyń birqatar jańa tetikteri engizildi. Biraq ony tıimdi iske asyrý úshin tıisti jaǵdaılar men arnaıy mamandar – defektolog, logoped, sýrdologter qajet. Balalardyń, sonyń ishinde olardyń sıfrlyq keńistiktegi qaýipsizdigin qamtamasyz etý máseleleri áli de ózekti. Kóptegen aýyl balalary úıirmeler men zamanaýı bilim berý tehnologıalarynan tys qalady. Jasóspirimderge tıisti kóńil bólinbeıdi ári olar ózin damytý úshin tyń múmkindikterden aırylyp otyr. Bul baǵytta júıeli túrde jumys júrgizip, Oqý-aǵartý, Densaýlyq saqtaý, Eńbek jáne áleýmettik qorǵaý, İshki ister mınıstrlikteri men óńir ákimdikteri arasyndaǵy vedomstvoaralyq úılestirýdi kúsheıtý qajet. Tujyrymdamada kózdelgen nysanaly ındıkatorlar balalardy damytýdyń, qoldaý men qorǵaýdyń ornyqty júıesin qalyptastyrýy tıis", - dep atap ótti Oljas Bektenov.