Almaty qalalyq kardıologıya ortalyǵynda transkateterlík ımplantatsıya (TAVI) ádísímen aortalyq qaqpaqshany auystyru boıynsha ekí joǵary tehnologıyalyq ota sáttí júrgízíldí. Az ınvazıvtí aralasu aortalyq qaqpaqshanyń krıtıkalyq stenozy dıagnozy qoıylǵan 72 jáne 77 jastaǵy patsıentterge jasaldy. Būl turaly qalalyq Densaulyq saqtau basqarmasynyń ókílderí aıtty, - dep habarlaıdy aqshamnews.kz tílshísí.
Būl otanyń basty erekshelígí – jalpy narkozdyń qoldanylmauy. Nauqastar esín saqtap, ota barysyn jeńíl kóterdí. Mūndaı tásíl asqynu qaupín edáuír azaıtyp, sauyǵu úderísín jedeldetedí. Būl, ásírese, qosymsha syrqaty bar egde jastaǵy adamdar úshín óte mańyzdy.
Aortalyq qaqpaqshanyń krıtıkalyq stenozy kezínde júrek sol jaq qarynsha men qolqa arasyndaǵy qysymnyń shamadan tys aıyrmashylyǵyna baılanysty auyr júkteme túsedí. Uaqytyly medıtsınalyq kómek kórsetílmese, būl júrek būlshyqetíníń álsírep, jıyrylu qabíletínen aıyryluyna ákeledí.
Interventsıyalyq kardıolog Orazbek Sahovtyń aıtuynsha, mıokardtyń qalpyna kelu múmkíndígí álí saqtalǵan sáttí ótkízíp almau asa mańyzdy.
"Auru asqynyp ketken jaǵdaıda, qaqpaqshany sáttí auystyrǵannyń ózínde júrektíń būrynǵy qalpy men qyzmetín tolyq qalpyna keltíru árdaıym múmkín bola bermeıdí", – deıdí maman.
Ota keude quysyn ashpaı jasalady: qaqpaqsha san arterıyasy arqyly júrekke jetkízílíp, rentgen jáne ultradybystyq baqylaumen ornatylady. Kardıologıya ortalyǵynda mūndaı joǵary tehnologıyaly otalar úsh jyldan astam uaqyt boıy sáttí júrgízílíp keledí. Osy kezeńde 80-nen astam kúrdelí ota jasalǵan.