Búgin Úkimet otyrysynda Premer-Mınıstri Álıhan Smaıylov jaýapty organdarǵa Daǵdarysqa qarsy jospardy 25 naýryzǵa deıin engizýdi tapsyrdy, dep habarlaıdy Almaty-akshamy.kz QazAqparatqa silteme jasap.
«Memleket basshysy elimizdi qarqyndy túrde damytý, ekonomıkanyń turaqtylyǵy men básekege qabilettiligin arttyrý jáne halyqtyń turmys deńgeıi men ál-aýqatyn jaqsartý jóninde asa aýqymdy mindetter qoıdy. Osyǵan oraı, Sizderdiń nazarlaryńyzdy kelesi máselelerge aýdarǵym keledi.
Birinshiden, Memleket basshysy daǵdarysqa qarsy sharalar paketin tez arada júzege asyrýdy tapsyrdy.
Daǵdarysqa qarsy sharalar ekonomıkany qoldaýǵa, ınflásıany baqylaýdy kúsheıtýge, valúta naryǵyn turaqtandyrýǵa, jańa jumys oryndaryn qurýǵa, sondaı-aq kásipkerlikti damytýǵa baǵyttalǵan», - dedi Á. Smaıylov.
Bul rette Úkimet basshysy jaýapty organdarǵa Daǵdarysqa qarsy jospardy taıaý arada talqylaýǵa engizýdi júktedi.
«Osyǵan baılanysty Ulttyq ekonomıka mınıstrligine, Ulttyq bank jáne jaýapty memlekettik organdarmen birlese otyryp, Daǵdarysqa qarsy josparyn 25 naýryzǵa deıin engizýdi tapsyramyn», - dedi Premer-Mınıstr.