TÚRKSOI-dyń Bas hatshysy Sultan Raev túrkolog-ǵalym Qarjaýbaı Sartqojaulynyń qazasyna baılanysty kóńil aıtty:
Belgili túrkolog ǵalym, profesor, Orhon-Enıseı rýnıkalyq kóne jazbalarynyń tanymal zertteýshisi, Túrki áleminiń kórnekti tulǵasy Qarjaýbaı Sartqojaulynyń dúnıeden ótkeni týraly qaraly habar qabyrǵamyzdy qaıystyrdy.
Jastaıynan áıgili akademık Álkeı Marǵulannan bata alyp, Túrik memleketteriniń kóptegen ǵalymdaryna ustaz bolǵan tanymal túrkolog aǵamyzdyń dúnıe salýy kúlli Túrki ǵylymy úshin orny tolmas aýyr qaza.
Qarjaýbaı Sartqojauly ómiriniń sońyna deıin qolynan qalamyn tastamaı, bar ómirin ǵylymnyń damýyna arnaǵan naǵyz ǵalym. Aıbyndy atalarymyz sıaqty kúndiz otyrmaı, tún uıyqtamaı túrik ulysy úshin eseli eńbek etti. Túrkiniń tereń tarıhynyń qupıasyn ashyp, baıyrǵy babalarymyzdyń rýhyn tiriltýge zor úles qosty. Tarıhı jadymyzdy jandandyryp, túrkilik sanamyzdy silkintti.
Aǵamyz túrkilerdiń baıyrǵy ataqonysyn da jyldar boıy zerttep, árbir tasyn zerdelep, kóptegen tarıhı qorymdarǵa arheologıalyq qazba jumystaryn júrgizdi.
Ǵalymnyń “Túrki qaǵanattary”, «Baıyrǵy túrik jazbalarynyń genezısi» týyndylary, «Orhon eskertkishteriniń tolyq Atlasy» úsh tomdyǵy, «Kóne túrki jazba úlgileri: Orhon muralary», «Úısin handyǵy», «Tasta qalǵan taǵylym», «Tas kitaptyń qupıasy», «Zapıskı kazahskogo túrkologa” jáne «Baba tiliniń baıyrǵy murasy: zertteýler» syndy ózge de irgeli eńbekteri túrki ǵylymı qaýymdastyǵynyń joǵary baǵasyna ıe boldy.
Orasań zor eńbekteri úshin Qarjaýbaı aǵamyzǵa Halyqaralyq Shyńǵysqan akademıasynyń akademıgi ataǵy berilip, Atatúrik atyndaǵy Halyqaralyq Túrik Tarıh akademıasynyń músheligine qabyldandy.
Ǵalymnyń eńbekteri kóptegen shetel tiline aýdarylyp, túrkiniń baı tarıhy týraly derekterdiń álemdik ǵylymı aınalymǵa túsýine de ólsheýsiz úles qosty. Túrkilerdiń óz dáýirinde ınovasıalyq revolúsıa, úlken órkenıet pen mádenıet jasaǵan halyq ekenin álemge naqty ǵylymı dáleldermen kórsetti.
Sońynda mol rýhanı qazyna qaldyrǵan Qarjaýbaı Sartqojaulynyń túrki tarıhyna qosqan ushan-teńiz eńbegi Túrki álemi úshin máńgilik mura, ólmes rýhanı azyq.
Marqumnyń ımany joldas bolsyn! Barlyq túrki halqyna, otbasy, týǵan-týystaryna qaıǵyryp kóńil aıtamyn!
Ardaqty aǵamyzdyń aty men jazǵan haty túrik halyqtarynyń jady men júreginde máńgi jasaı beredi.