Bul týraly Indýstrıa jáne ınfraqurylymdyq damý mınıstri Qaıyrbek Óskenbaev málimdedi.
Qazaqstanda qurylys sapasyn tekserý úshin táýelsiz memlekettik zerthanalyq qyzmet qurý josparlanyp otyr, dep habarlaıdy Almaty-akshamy.kz.
Mınıstr qurylys sapasyna qatysty azamattardan kóptegen shaǵym túsetinin atap ótti. Osyǵan baılanysty qurylys sapasyna memlekettik baqylaýdy kúsheıtý maqsatynda zańnamaǵa túzetýler ázirlendi:
1. Qurylysty sapasyz josparlaýdy boldyrmaý maqsatynda qala qurylysy saraptamasyn engizý;
2. Qurylystyń barlyq kezeńinde (qazanshuńqyr qazýdan bastap abattandyrý jumystaryna deıin) obektilerge josparly baqylaý engizý jáne memlekettik sáýlet-qurylys baqylaýy basqarmalarynyń nysandardy paıdalanýǵa qabyldaýǵa qatysýy;
3. Paıdalanylatyn materıaldar men oryndalǵan jumystardyń sapasyna zerthanalyq jáne tehnıkalyq tekseris júrgizý úshin táýelsiz memlekettik zerthanalyq qyzmet qurý.
Qazir zań jobasy múddeli memlekettik organdarmen jáne uıymdarmen talqylanyp jatyr.
«Qurylys prosesin sıfrlandyrý aıasynda memlekettik fýnksıalardy iske asyrý úshin modýlderi bar eQurylys biryńǵaı qurylys portaly iske qosylyp, qurylys tizilimi júkteldi. Reestrge ózgerister men tolyqtyrýlar engizý, sarapshylardy testileý rásimi avtomattandyryldy jáne tehnıkalyq qadaǵalaý eseptiligi elektrondy formatqa aýystyryldy», - dedi Óskenbaev Úkimet otyrysynda.
Sonymen qatar atqarýshy qujattamany elektrondy formatqa aýystyrý úshin portaldy naryq sýbektileriniń korporatıvtik aqparat júıelerimen ıntegrasıalaý júrgizilýde. Portalda beriletin aqparatqa qoıylatyn talaptar aıqyndalyp, naryq osyndaı júıelerdiń ónim berýshileri qyzmetterin derbes tańdaıdy.
Búgingi tańda atqarýshy qujattamany pılottyq rejımde júrgizý turǵyn úı obektileri men avtomobıl joldarynda iske qosyldy.
Mınıstr qabyldanǵaly otyrǵan tásilder azamattardyń turǵyn úı máselelerin sheshýge baǵyttalǵan jáne turǵyn úı qurylysyn damytýdy yntalandyryp, qurylys prosesteriniń ashyqtyǵy men josparlaý sapasyn qamtamasyz etetinin atap ótti.