Memleket basshysy Qasym-Jomart Toqaev mektep muǵalimi Tatána Beloýsovany quttyqtady, - dep habarlaıdy aqshamnews.kz tilshisi.
Prezıdent Almaty qalasyndaǵy №95 mektep-lıseıi hımıa pániniń muǵalimi Tatána Beloýsovany Global Teacher Prize halyqaralyq baıqaýynyń qorytyndysy boıynsha álemdegi eń úzdik 50 pedagogtiń qataryna enýine oraı quttyqtady.
"Bul joǵary baǵa – Sizdiń óskeleń urpaqqa taǵylymdy tárbıe men ozyq bilim berý isine sińirgen uzaq jylǵy eńbegińizdiń jemisi. Bizdiń maqsatymyz – zıatker ultqa aınalý. Sondyqtan memleket árdaıym muǵalimderdiń mártebesin kóterip, olardy jan-jaqty qoldaıdy", – dedi Qasym-Jomart Toqaev.
Tatána Beloýsova týraly ne belgili?
Almatydaǵy №95 mektep-lıseıdiń hımıa páni muǵalimi Tatána Beloýsova Global Teacher Prize 2025-2026 halyqaralyq baıqaýynyń qorytyndysy boıynsha álemniń eń úzdik 50 pedagoginiń qataryna endi.
Tatána Beloýsova - pedagog-sheber, "Qazaqstannyń úzdik ustazy – 2024" qurmetti ataǵynyń ıegeri. Onyń kandıdatýrasy saýalnama men qosymsha materıaldardy tapsyrýdan bastap, saraptamalyq baǵalaý jáne fınaldyq irikteýge deıingi kópsatyly kezeńnen ótti.
Álemniń eń úzdik 50 muǵaliminiń resmı tizimi 2025 jyly 15 jeltoqsanda Global Teacher Prize resmı saıtynda jarıalandy. Fınalısterdi marapattaý rásimi 2026 jyly 1-5 aqpan aralyǵynda Dýbaıda halyqaralyq bilim berý forýmy aıasynda ótedi.
Aıta keteıik, Qazaqstan Global Teacher Prize baıqaýyna besinshi ret qatysyp otyr. Osy ýaqytqa deıin el ókilderi, bıylǵy irikteýdi qosqanda, úsh márte álemniń úzdik 50 pedagoginiń qataryna engen.