Zardap shekken halyqty shuǵyl evakýasıalaý úshin «Qazavıaqutqarý» AQ áýe kemeleri daıyn
Elimizde kóktemgi sý tasqyny qaýpiniń aldyn alý jáne kúresý sharalary jalǵasyp jatyr, dep habarlaıdy Almaty-akshamy.kz QazAqparatqa silteme jasap.
«Sý tasqyny qaýpine baılanysty memlekettik quzyrly organdardyń qatysýymen respýblıkalyq jáne oblystyq jedel shtabtar jumys istep tur. Sý tasqynyna baılanysty eskertý týraly 5 397 SMS-habarlama jáne «Dármen» mobıldi qosymshasy arqyly 884 habarlama jiberildi. Jedel jelige aqparattyq sıpattaǵy 350-den astam qońyraý tústi. Sý tasqynyn týdyrǵan negizgi sebepter – sý ótkizý arnalarynyń bolmaýy, aryqtardyń, eldi mekender mańyndaǵy qorǵanysh úıindileriniń zardap shegýi. Sol sıaqty kentterde aryq júıesiniń bolmaýy, ózen arnalarynyń tolyp ketýi men shógýi jáne turǵyn úılerdi sý qorǵaý beldeýlerine jaqyn mańda salý da sebep», - dedi TJM Tótenshe jaǵdaılardy joıý departamentiniń bastyǵy Qaharman Orazalın OKQ-de ótken brıfıńide.
TJM ókili keltirgen aqparatqa sáıkes, sý tasqyny qaýpiniń aldyn alý jáne kúresý úshin 35 myńnan astam adam (35 945) jáne shamamen 11 myń birlik tehnıka uıymdastyryldy.
«Tótenshe jaǵdaıda mamandar men quraldardy jedel tasymaldaý, sondaı-aq zardap shekken halyqty shuǵyl evakýasıalaý úshin «Qazavıaqutqarý» AQ áýe kemeleri daıyn. Odan bólek, Azamattyq qorǵanystyń áskerı bólimderi de qutqarý operasıalaryna qatysýǵa bekem otyr», - deıdi ol.
Sondaı-aq, Tótenshe jaǵdaılardy joıý departamentiniń bastyǵy kelesi qaýipsizdik erejelerin eske saldy:
- Tótenshe jaǵdaılar qyzmeti jáne jergilikti atqarýshy organdardyń usynystaryn oryndaý;
- úı aýmaǵyn qardan ýaqytyly tazartý;
- ınertti materıaldardy jáne qaptardy aldyn ala daıyndaý;
- jergilikti atqarýshy organdarynan evakýasıalaý pýnktterin jáne oǵan jetýdiń jolyn bilý;
- úılerdiń janynda ornalasqan aryqtar men sý ótkizý qubyrlaryn tazartý;
- sý qoımalarynda balalardy qaraýsyz qaldyrýǵa bolmaıdy, ásirese, muz erip jatqanda.