«Qazaqstan halqyna» qorynyń tóraǵasy Bolat Jámishev Prezıdentke esep berdi
Memleket basshysy «Qazaqstan halqyna» qorynyń tóraǵasy Bolat Jámishevti qabyldady, dep habarlaıdy Aqordanyń baspasóz qyzmeti.
Qor ashyqtyq, eseptilik, zańdylyq jáne turaqtylyq sekildi qoǵamdyq qarjyny basqarýdyń negizgi qaǵıdattaryn saqtaıdy jáne elimizdegi qaıyrymdylyq ekojúıesiniń damýyna eleýli úles qosady.
Qordyń jumysy jalpy jurtshylyqtyń senim mandatyna negizdelgen.
Qordyń qaıyrymdylyq jobalary men baǵdarlamalary qoǵam ómiriniń mańyzdy salalaryna aıtarlyqtaı áser etedi jáne kóbine olardyń damýyna tyń serpin beredi.
Bolat Jámishevtiń aıtýynsha, qor azamattarymyzdyń densaýlyq saqtaý, bilim berý, áleýmettik qoldaý, mádenıet jáne sport salalaryndaǵy negizgi máselelerin sheshýge baǵyttalǵan jalpy somasy 146,5 mıllıard teńge bolatyn 40-tan astam qaıyrymdylyq baǵdarlama men jobany qarjylandyrady. Sondaı-aq tótenshe jaǵdaılar kezinde zardap shekken azamattarǵa kómek kórsetiledi. Qordyń baǵdarlamalary aýyldyq eldi mekender men shaǵyn qalalarǵa basymdyq bere otyryp, elimizdiń barlyq óńirlerinde júzege asyrylady.
Qordyń eń iri baǵdarlamasy – ómirge qaýip tóndiretin jáne orfandy (sırek) aýrýmen aýyratyn naýqastar úshin dárilik preparattardy satyp alý. 324 qazaqstandyq (onyń 243-i balalar) úshin 24,9 mıllıard teńge kóleminde dárilik zattardyń 36 túri, sondaı-aq Qazaqstanǵa alǵash ret jeti preparat, onyń ishinde álemdegi eń qymbat «Zolgensma» dárisi satyp alyndy. Qordyń qoldaýynyń nátıjesinde elimizde tirek mektepter júıesi (80 mektep), aýyldaǵy, ásirese az jabdyqtalǵan mektepterdegi bilim deńgeıin arttyrý úshin quzyrettilik ortalyqtary quryldy.
Qor múmkindigi shekteýli, az qamtylǵan jáne aýyldan shyqqan talapkerlerdiń joǵary bilim alý múmkindigin qamtamasyz etedi. Respýblıka boıynsha 2200-den astam stýdent «Qazaqstan halqyna» qorynyń granttary men stıpendıasynyń ıelengen. Aýyldarda sportpen aınalysatyn zaldardyń tapshylyǵy men qoljetimsizdigin eskerip, qordyń qoldaýymen aýyl jastaryna arnalǵan 24 sport zaly ashyldy. Qazirgi tańda 76 zaldy iske qosý jumystary jalǵasady.
Erekshe balalarǵa arnalǵan ońaltý ortalyqtaryn qurý boıynsha aýqymdy jumys júrgizilip jatyr. Jalpy 4 erte aralasý ortalyǵy jáne aýtızm men basqa da aqyl-oı aýytqýshylyǵy bar balalarǵa arnalǵan 4 ortalyq ashyldy. 13 ortalyqty ashý jumystary júrgizilýde.
15 tamyzdan bastap qordyń bastamasymen «Óńirlerge arnalǵan qor» atty ulttyq qaıyrymdylyqtyń II konferensıasy bastaldy. Elimizdiń barlyq aımaǵynda dóńgelek ústel formatynda óńirlerdiń qajettilikteri men erekshelikterin eskere otyryp, júzege asyrýǵa usynylatyn bastamalar talqylanyp, jobalar aıqyndalady. Ázirlengen usynystar 2024 jyly «Qazaqstan halqyna» qorynyń qyzmetinde basshylyqqa alynady.