Qazaqstannyń avıasıalyq ákimshiligi otandyq áýe tasymaldaýshylaryna Iran aýmaǵynyń ústimen reıster oryndaýǵa ýaqytsha shekteý engizdi, dep habarlaıdy Aqshamnews.kz tilshisi.
Qazaqstannyń avıasıalyq ákimshiligi Iran áýe keńistigindegi qaýipsizdik táýekelderiniń artýyna baılanysty qazaqstandyq áýe kompanıalaryna bul aımaq arqyly ushýǵa ýaqytsha tyıym saldy. Tıisti sheshim QAÁ taratqan resmı aqparatta jarıalandy.
Vedomstvonyń málimetinshe, qazirgi jaǵdaıda Irannyń áýe keńistigin paıdalaný qatań shektelip otyr. Tek erekshe ókim berilgen jaǵdaıda ǵana bul talaptan tys sheshim qabyldanýy múmkin.
«Barlyq reıster qaýipti aımaqty aınalyp ótetin balama baǵyttar arqyly oryndalady. Jaǵdaı Qazaqstannyń avıasıalyq ákimshiliginiń turaqty baqylaýynda. Aımaqtaǵy ahýal ózgergen jaǵdaıda qosymsha sharalar qabyldanady», – delingen resmı habarlamada.
Eske salaıyq, Irandaǵy jaǵdaı 2025 jylǵy 28 jeltoqsanda kúrt shıelenise tústi. Aldymen turǵyndar baǵanyń ósýi men ulttyq valútanyń qunsyzdanýyna narazylyq bildirse, keıin bul tolqýlar 2022 jyldan beri jalǵasyp kele jatqan jappaı narazylyqtardyń jańa kezeńine ulasty. Sońǵy bir jylda AQSH dollarynyń baǵamy shamamen 80 paıyzǵa qymbattaǵan.