Aýyl sharýashylyǵy mınıstri Aıdarbek Saparov Úkimet otyrysynda 2025 jylǵy egin jınaý jumystarynyń qorytyndylary týraly baıandady.
Ol aıaqtalǵan maýsym aýyl sharýashylyǵy óndirisiniń turaqty ósimin kórsetkenin atap ótti, - dep habarlaıdy Aqshamnews.kz.
«Bıyl tek dándi daqyldar boıynsha ǵana emes, sonymen qatar burshaqty jáne maıly daqyldar sıaqty joǵary rentabeldi ári suranysqa ıe daqyldar turǵysynan da rekordtyq jyl boldy. Bul daqyldarǵa egis alqaptaryn ártaraptandyrý sheńberinde erekshe nazar aýdaryldy»,— dedi Aıdarbek Saparov.Mınıstr búgingi kúni respýblıka boıynsha astyq jınaý aıaqtalǵanyn, 16 mln gektar alqaptan gektaryna 17 sentner ortasha ónimdilikpen 27 mln tonna astyq qambaǵa quıylǵanyn atap ótti. Bıdaı 12,2 mln gektardan jınalyp, 20,3 mln tonnasy bastyryldy – bul ótken jylmen salystyrǵanda jarty mln tonnaǵa kóp. Egis alqaptaryn ártaraptandyrý nátıjesinde bıdaıdyń egis kólemi shamamen 900 myń gektarǵa qysqarǵanymen, óndiris kólemi azaımaı, kerisinshe artty. Bul ozyq agrotehnologıalardyń tıimdiligin dáleldeıdi. Mınıstrdiń sózinshe 4 mln tonnaǵa jýyq arpa jınalǵan. Burshaq daqyldarynyń túsimi alǵash ret 1 mln tonnaǵa jetti. Maıly daqyldar boıynsha búgingi kúnniń ózinde rekordtyq 4,3 mln tonna jınaldy jáne egin jınaý jumystary jalǵasyp jatyr. Sonymen qatar 2,9 mln tonna kartop, 3,8 mln tonna kókónis, 2,6 mln tonna baqsha daqyldary jınaldy. Maqta jınaý jumystary aıaqtaldy. Tamshylatyp sýarýdy qoldaný nátıjesinde keıbir sharýashylyqtar gektarynan 50 sentnerge deıin ónim aldy. Jalpy alǵanda, ortasha ónimdilik 30 s/ga deńgeıinde qalyptasyp, 428 myń tonna shıtti maqta jınaldy – bul ótken jylmen salystyrǵanda 42%-ǵa kóp.