Qazaqstandyqtardyń tabysynyń shamamen 1,2%-y ózge adamdarǵa kómek kórsetýge jumsalatyny belgili boldy, - dep habarlaıdy Aqshamnews.kz.
Bul týraly Ranking.kz saıty habarlady. Al elimizdegi eń dáýletti azamattardyń qaıyrymdylyqqa qansha qarajat bólip otyr?
Forbes.kz portaly qazan aıynyń basynda jarıalaǵan málimetke sáıkes, Qazaqstannyń eń baı 10 kásipkeriniń barlyǵy derlik qaıyrymdylyqpen aınalysady. Olardyń keıbiri óz qorlary arqyly áleýmettik jobalardy júzege asyryp, ashyq qarjylyq esep júrgizedi.
Bolat Ótemuratov: 51,9 mlrd teńge - ıgi isterge
Reıtıńtiń kósh basynda dástúrli túrde Bolat Ótemuratov tur. Onyń atyndaǵy qor - eldegi eń ashyq ári belsendi qorlardyń biri.
2024 jylǵy esep boıynsha, ótken jyly qor qaıyrymdylyq pen áleýmettik jobalarǵa 51,9 mlrd teńge jumsaǵan. Bul 2023 jylmen salystyrǵanda 2,8 ese kóp.
Qordyń tanymal jobalarynyń biri - «Aýtızm. Álem barshaǵa ortaq» baǵdarlamasy. Búginde elimizdiń túrli óńirinde aýtızmi bar balalarǵa arnalǵan 13 ortalyq jumys isteıdi.
Sonymen qatar, qor Qyzylorda áýejaıyndaǵy jolaýshylar termınalynyń, Esik qalasyndaǵy mekteptiń qurylysyna qarjy bólgen, sý tasqynynan zardap shekkenderge jáne az qamtylǵan otbasylarǵa kómek kórsetken.
Vácheslav Kım jáne ANSA qory
Ekinshi orynda turǵan Vácheslav Kım birneshe jyldan beri ANSA qaıyrymdylyq qoryn turaqty qarjylandyryp keledi.
Tek ótken jyldyń ózinde qor 2 myń qazaqstandyqqa 20 mlrd teńgeden astam kómek kórsetken.
ANSA qorynyń qarajatyna Soltústik Qazaqstan men Aqmola oblystarynda sý tasqynynan zardap shekkenderge arnalǵan eki kópqabatty úı, 300 jeke úı, balabaqsha salyndy.
Sondaı-aq Esen Foundation qorymen birlesip, aýyl turǵyndarynyń bilim men medısınaǵa qoljetimdiligin arttyrýǵa baǵyttalǵan Baquatty Audan jobasy iske qosyldy.
Bilim salasynda qor Aýyldyq pedagogıkalyq akademıany, 5 Sandyq qosymsha bilim berý ortalyǵyn ashty. Sonymen qatar erekshe bilim berýdi qajet etetin balalarǵa arnalǵan ınklúzıvti kabınetter jabdyqtaldy.
Qor sportty da qoldaıdy: «Barys» hokeı klýbynyń ımpakt-seriktesi atandy, al 2025 jyldan bastap ANSA qory Qazaqstannyń bochcha federasıasynyń resmı seriktesi bolady.
Bes iri mesenat jáne ashyq eseptilik dástúri
Qazaqstannyń eń baı bes kásipkeriniń árqaısysynyń jeke qaıyrymdylyq qory bar. Olardyń qatarynda:
- Nurlan Smaǵulov (Astana Group);
- Tımýr Týrlov (Freedom Holding Corp);
- Tımýr Qulybaev (Halyk qory arqyly).
Mysaly, Halyk qory mektepter men balabaqshalar salýǵa, muqtaj otbasylarǵa kómek kórsetýge jáne daryndy jastardy qoldaýǵa qarjy bóledi.
Al Tımýr Týrlov shahmat, balalar fýtboly jáne ekologıalyq jobalardy damytýǵa erekshe kóńil bóledi.
Kórinbeıtin qaıyrymdylyq: ashyq derekter az
Forbes tizimindegi Vladımır Kım, Aıdyn Rahymbaev, Shýhrat Ibragımov, Andreı Lavrentev jáne Keńes Raqyshev te qaıyrymdylyqpen aınalysady. Alaıda olardyń bul baǵyttaǵy naqty shyǵyndary ashyq jarıalanbaıdy — aqparat kóbine jeke jobalar týraly jańalyqtarda ǵana kezdesedi.
Kóptegen kásipkerler tek óz qorlarymen shektelmeı, basqa uıymdarǵa da úles qosady. Mysaly, «Ana Úıi» qorynyń jumysyna birneshe mesenat turaqty túrde demeýshilik etedi. Bul qordyń basty maqsaty — áleýmettik jetimdikti azaıtý, ıaǵnı analardyń balalarynan bas tartpaýyna jaǵdaı jasaý.
Qaıyrymdylyq mádenıeti qalyptasyp keledi
Keıingi jyldary memleket qaıyrymdylyq bastamalaryn belsendi qoldap keledi.
2023 jyldan beri elimizde «Qurmetti qaıyrymdy jan» ataǵy berilip keledi. Bıyl bul marapatty 33 qazaqstandyq ıelenip, jalpy sany 164 adamǵa jetti.
QR Mádenıet jáne aqparat mınıstrliginiń dereginshe, qazir elde 1,3 myń qaıyrymdylyq uıymy jumys isteıdi.
2025 jyly «Igi ister marafony» jobasy aıasynda 2,5 myńnan astam qaıyrymdylyq bastamasy júzege asty, al eriktilerdiń jalpy sany 275 myńnan asyp, onyń ishinde 3,5 myńy – 55 jastan asqan azamattar.