Bul dáriler julyn bulshyq et atrofıasy bar balalardy emdeýge arnalǵan.
«Qazaqstan halqyna» qoǵamdyq qory alǵashqy qaıyrymdylyq jobalaryn qarjylandyrýdy bastady, dep habarlaıdy Almaty-akshamy.kz
«Saraptama komıtetiniń sheshimimen Qor reabılıtolog-nusqaýshylardy oqytý jáne álemdegi eń qymbat Zolgensma dárisin satyp alý boıynsha «Tusaýkeser» jobasyn qarjylandyrady», - delingen habarlamada.
«Tusaýkeser» jobasy Qazaqstan óńirlerindegi dene shynyqtyrý-saýyqtyrý klýbtaryn qoldaýǵa baǵyttalǵan, onda mentaldi jáne dene kemistigi bar balalar bilikti mamandardyń baqylaýymen arnaıy ádisteme boıynsha sportpen shuǵyldana alady. Joba elimizdiń tórt óńirinde nusqaýshy-reabılıtologtardy oqytýdy kózdeıdi.
Sondaı-aq, qor sırek kezdesetin (orfandyq) ómirge qaýip tóndiretin jáne sozylmaly aýrýlary bar balalarǵa ataýly kómek kórsetý týraly sheshim qabyldady.
QR Densaýlyq saqtaý mınıstrliginiń derekteri boıynsha, sońǵy bes jylda orfandyq aýrýlary bar naýqastar sanynyń 49 paıyzǵa, onyń ishinde balalardyń - 11 paıyzǵa ósýi baıqalady (2021 jyldyń sońynda - 13426 bala). 2020 jyly dárilik zattarmen qamtamasyz etýdiń 23 paıyz, 2021 jyly 26,8 paıyz orfandyq aýrýlary bar pasıentterge tıesili.
Osylaısha, qor 9,7 mıllıard teńge somasyna 24 bala men eki eresekti julyn bulshyq etiniń atrofıasy, Dúshenniń bulshyq et dıstrofıasy aýrýlarymen dárilik qamtamasyz etý boıynsha jobany qarjylandyrady. Sonyń ishinde Qazaqstanda tirkelmegen Onasemnogen abeparvovek (Zolgensma) qymbat dárilik preparatyn julyn bulshyq et atrofıasy bar pasıentterge arnalǵan tórt bala úshin satyp alynady.
Sarapshylyq komıteti orfandyq aýrýlarmen aýyratyn naýqastardy emdeý úshin dárilik zattardy satyp alýǵa Densaýlyq saqtaý mınıstrligi janyndaǵy saraptamalyq-keńesshi keńestiń ózekti (merzimi ótpegen) qorytyndysy bolǵan jaǵdaıda ǵana qorǵa usynymdar beredi. Qajetti qujattardyń bolmaýyna baılanysty ótinimderdiń bir bóligi qabyldanbady, alaıda aldaǵy ýaqytta bul ótinimder qarastyrylýy múmkin.