Kelisim boıynsha kıim úlgileri ulttyq órnegi bar jeke dızaında jasalmaq.
Qazaqstan fýtbol federasıasy men ÝEFA qurama komandalar úshin jańa fýtbol ekıpırovkasyn daıyndaý jóninde kelisimge qol qoıdy, dep habarlaıdy Almaty-akshamy.kz.
Sonymen qatar kelisimniń basty artyqshylyǵy – jankúıerlerge arnalǵan ekıpırovkalardyń qoljetimdi bolýy. Ár jankúıer fan-shoptardan ulttyq quramanyń eksklúzıvti kıim úlgilerin, sondaı-aq erekshe dızaında daıyndalǵan taýarlardy satyp alý múmkindigine ıe bolady.
Ulttyq quramaǵa arnalǵan jańa fýtbol jeıdeleri ıtalıalyq «Errea Sport» kompanıasymen birge ázirlenedi. Barlyq ekıpırovka «100 OEKO-TEX» standarty boıynsha sertıfıkasıadan ótedi. Bul standart densaýlyqqa zıan zattarǵa qatań shekteý qoıady.
Oıyn formasy úsh jıyntyqtan turady: úı formasy, qonaq formasy jáne rezerv.
Ekıpırovkanyń dızaın jumystaryna qazaqstandyq dızaınerler jáne Errea mamandary qatysady.
Kelisimge qol qoıý úshin ÝEFA prezıdentiniń ulttyq qaýymdastyqtar boıynsha keńesshisi Iozef Klıment Qazaqstan astanasyna arnaıy keldi. Ol FIFA-nyń eýropalyq qaýymdastyqtar boıynsha dırektory Elhan Mamadovpen birge 19 qyrkúıek kúni ótetin Qazaqstan fýtbol federasıasynyń Konferensıasynyń mártebeli qonaǵy bolmaq.
«Qazaqstan fýtbol federasıasyna ÝEFA jáne onyń seriktestikterine yntymaqtastyqty qoldap, Kit Assiatance Scheme baǵdarlamasyna qosylǵany úshin alǵysymyzdy aıtamyz. Bul sheshim qazaqstandyq fýtboldyń ımıjin arttyra túsedi dep senemin. Qazaq halqynyń ereksheligin bildiretin jeke dızaın daıyndaýǵa jáne jeke fan-shop iske qosýǵa múmkindik bar. ÝEFA bul sheshimdi jan-jaqty qoldaýǵa daıyn», - dep atap ótti ÝEFA prezıdentiniń ulttyq qaýymdastyqtar boıynsha keńesshisi Iozef Klıment.
«Konferensıa qarsańynda FIFA jáne ÝEFA-dan kelgen áriptesterimizben birqatar kezdesý uıymdastyryldy. Búgin biz ÝEFA-nyń kezekti baǵdarlamasynyń qatysýshysy boldyq. Baǵdarlama Qazaqstan quramasynyń ımıjin arttyrady dep senemin. Qoldaý kórsetken áriptesterimizge alǵys aıtamyn», - dep atap ótti Qazaqstan fýtbol federasıasynyń bas hatshysy Oljas Abraev.
Aıta keteıik, ulttyq quramalar 2023 jylǵy maýsymnan bastap jańa formamen oınaı bastaıdy.