Az-Zaharıa medresesi qaqpasynyń sýreti tabyldy
Mysyrda Sultan Beıbarys medresesi qaqpasynyń esh jerde jarıalanbaǵan sýreti tabyldy, dep habarlaıdy Almaty-akshamy.kz QazAqparat-qa silteme jasap.
Súıinshili habardy Qazaqstannyń Mysyrdaǵy Tótenshe jáne ókiletti elshisi Qaırat Lama Sharıf Facebook-paraqshasynda jazdy.
«Súıinshi, aǵaıyn! Sultan Beıbarys medresesiniń áshekeıli qaqpasynyń sýreti tabyldy.
Mysyrlyq mámlúktanýshylar buryn-sońdy áleýmettik jelilerde jarıalanbaǵan az-Zaharıa medresesi qaqpasynyń sýretin taýyp berdi. Osy úshin Imad Osman Mahran bastaǵan mámlúktanýshylarǵa jáne Mysyrdyń Kóne eskertkishter men týrızm mınıstrliginiń qyzmetkerlerine sheksiz alǵysymdy aıtamyn», - dep jazdy dıplomat.
Elshiniń aıtýynsha, 1262 jyly Aın Jalut shaıqasynan jeńispen oralǵan Sultan Beıbarys Kaırde teńdesi joq jańa úlgidegi medrese salyp, onyń bas qaqpasyn Kaırdiń qolóner sheberlerine jasatqan.
«Qaqpanyń mańdaıshasynda «Mońǵol-tatar basqynshylary men kresshilerge Mysyr jerin bastyrmaǵan ál-Málık az-Zahır Rúkn ad-Dın Beıbarys» dep jazylǵan. Kóne Kaır shaharynyń tórinde osyndaı áshekeıli Jeńis qaqpasyn ornatqan Sultan Beıbarystyń sáýlet ónerindegi talǵamy zor bolǵanyn aıǵaqtaıdy», - dep jazdy Qaırat Lama Sharıf.