19 qazanda Parıjdegi Lývrdy tonaldy. Onda áshekeı buıymdar men qundy zattar urlanǵan. Keıin kúdiktiler qamaýǵa alynǵany belgili boldy. Bul HHİ ǵasyrdaǵy basty oqıǵalardyń biri boldy. Aqshamnews.kz tilshisi Qazaqstandaǵy shýly tonaý isterine sholý jasady.
Almatyda 1996 jyly zergerlik dúken tonaldy. Qaraqshylar kúzetshini atyp, 20 myń dollardy alyp ketken. Bul týraly "Reıder" baǵdarlamasynda kórsetildi.
2017 jylǵy tonaý deregi
Buǵan uqsas jaǵdaı 2017 jyly 22 tamyzda Almaty oblysyna qarasty Talǵardaǵy Kaspi Bank bólimshesinde boldy. Betperde kıgen urylar shatyr arqyly bólimsheniń kasasyna túsip, qyzmetker áıelderdi baılap, aqshany alyp ketken. Keıin olar arqan satylaryn paıdalanyp, ǵımarattan qashyp ketipti. Beınebaqylaý kamerasy qylmyskerlerdi túsirip alǵan. Olar nebary 2 mınýtta bankty tonap úlgergen.
Ǵasyr tonaýy
2009 jyly Astanada “ǵasyr tonaýy” iske aspaı qaldy. Belgisiz bireýler “Sesnabank” fılıaly turǵan ǵımaratqa deıin jer qazyp jetken. Qylmys birneshe aı boıy daıyndalǵan. 75 metrlik tonnel bos turǵan garajdar jaǵynan qazylǵan. Edendegi tesikti qyzmetkerlerdiń biri lınoleýmmen jabylǵan jerge qulap kete jazdaǵanda baıqap qalǵan. Degenmen qaraqshylardyń oıy iske aspaı qaldy, sebebi urylar qundy zat joq qosymsha bólmege túsken. Qylmyskerlerdiń biri ustalyp, tórt jylǵa bas bostandyǵynan aıyryldy.
Kazınodaǵy shabýyl
Sol jyly Qapshaǵaıda “Flamıngo” kazınosyna qarýly shabýyl jasaldy. 22 tamyzda tańǵy tórt shamasynda betperde kıip, qarý asynǵan úsh adam kazınoǵa kirip, jurtty qarýmen qorqytyp, 30 mıllıon teńgeden asa aqshany qoldy qylǵan. Keıin olar Qapshaǵaı turǵynyn jaralap, kóligin tartyp aldy. Keıin ony belgisiz jerge aparyp, aǵashqa baılap ketken. Qylmys besinshi kúni ashyldy.
Zergerlik dúkenniń tonalýy
2010 jyly Almatynyń ortalyǵynda zergerlik dúkeni tonaldy. Qylmyskerler bir mıllıon dollarǵa jýyq somaǵa úsh myńnan asa altyn jáne kúmis áshekeıdi urlap ketken. Urylar bárin muqıat ári aldyn ala josparlaǵan. Ǵımaratqa túnde úıdiń jertólesi arqyly kirgen. Dúkenniń beton edenin burǵylap, dabyldy óshirip, áshekeılerdi erkin alyp shyqqan. Dúken ornalasqan úıdiń turǵyndary birde-bir kúdik týdyrǵan dybys estimegen. Tek tańerteń qyzmetkerler áshekeılerdiń joǵyn anyqtaǵan.
Aıyrbastaý pýnktine jasalǵan shabýyl
2015 jyly Astanada aıyrbastaý pýnktine qarýly shabýyl jasaldy. Bir jigit aıyrbastaý pýnktine kelip, terezesin syndyra bastaǵan. Keıin ury pnevmatıkalyq tapanshadan oq atqan. Kasır ústeldiń astyna tyǵylyp, kúzetke habarlasqan. Qylmysker shamamen eki myń rúbl alyp úlgergen. Keıin ol ustaldy.
Lombard isi
2016 jyly Astanada lombardqa shabýyl jasalyp, adamdar kepilge alynǵan. 14 tamyzda saǵat 08:30 shamasynda er adam Kenesary kóshesindegi “M-Lombard” ǵımaratyna basyp kirgen. Pnevmatıkalyq tapanshamen qorqytyp, zergerlik buıymdardy almaq bolyp, kireberis esikti ishinen qulttap, lombardtyń eki qyzmetkerin kepilge alǵan. Keıin shabýyl jasaǵan er adam istegenine ókinip, mundaı qylmysqa otbasyndaǵy aýyr qarjylaı jaǵdaıǵa baılanysty barǵanyn aıtty. Onyń aıtýynsha, qyzynyń emine aqsha jetpegen.