Qazaqstan quramasy 22-31 qazan aralyǵynda Bahreınniń Manama qalasynda ótken úshinshi jasóspirimder arasyndaǵy Azıa oıyndarynda ónerin kórsetýin aıaqtady, - dep habarlaıdy aqshamnews.kz tilshisi.
Jarys qorytyndysy boıynsha ulttyq qurama jalpykomandalyq esepte úshinshi orynǵa ıe boldy. Otandastarymyz 93 medal jeńip aldy. Onyń ishinde – 24 altyn, 29 kúmis jáne 40 qola júlde.
Birinshi orynǵa 147 medalmen (63 altyn, 49 kúmis, 35 qola) Qytaı quramasy ıe boldy. 81 medal (37 altyn, 16 kúmis, 28 qola) enshilegen Ózbekstan ekinshi orynǵa jaıǵasty.
Qazaqstandyq sportshylar jıyrmadan astam sport túri boıynsha baq synap, júldeli oryndarmen qatar, birneshe rekord jańartty.
Aýyr atlet Álıhan Áskerbaı birden birneshe joǵary jetistikke qol jetkizdi. Ol julqa kóterýde jáne serpe kóterýde jasóspirimder arasyndaǵy álem, Azıa jáne Azıa oıyndarynyń rekordtaryn jańartty.
Jeńil atlet Maksım Sajnev, júzgish Aleksandr Rýmynskıı jáne ziltemirshi Nurjan Jumabaı da jasóspirimder arasyndaǵy Azıa oıyndarynyń rekordyn jańartty.
Qazaqstandyq boksshylar eń kóp altyn medaldi jeńip aldy (5 altyn). Dzúdoshylar tórt altyn, al aýyr atletter úsh altyn júldege ıe boldy.
Qazaqstan quramasy óz tarıhynda eń joǵary kórsetkishke qol jetkizdi. 2009 jyly Sıngapýrda ótken alǵashqy jasóspirimder arasyndaǵy Azıa oıyndarynda el qorjynynda nebári 14 medal (4 altyn, 6 kúmis, 4 qola) bolyp, jalpy esepte segizinshi oryn alǵan edi.
2013 jyly Qytaıdyń Nankın qalasynda ótken jarysta otandastarymyz 13 medal (1 altyn, 4 kúmis, 8 qola) jeńip alyp, 13-orynǵa taban tiregen bolatyn.