Almaty ákimi keshki ýaqytta qalanyń kóshelerin aralap, sándik-sáýlettik jáne kósheni jaryqtandyrý júıesiniń jumysyn tekserdi.
Jaryq ınfraqurylymyn damytý jumystary jaıly ári qaýipsiz qalalyq orta qalyptastyrýǵa baǵyttalǵan keshendi baǵdarlama aıasynda qolǵa alynǵan. Ásirese, ǵımarattardyń sáýlettik kórkemdigi men turǵyndardyń keshki ýaqyttaǵy qaýipsizdigine basa nazar aýdarylǵan. Joba aıasynda energıa únemdeıtin LED-júıeler men jaryqty ıntellektýaldy basqarý sheshimderi ornatylyp jatyr. Qazirgi ýaqytta Abaı men Dostyq dańǵyldary jáne Qonaev kóshesi boıyndaǵy negizgi nysandarda 21 ǵımarattyń jaryqtandyrylýy aıaqtalyp, 1600-den astam zamanaýı sham ornatyldy.
Sonymen qatar kóshe jaryǵyn jańartý jumystary da júrgizilip jatyr. Tólebaev kóshesinde 97 eski shamnyń ornyna jańa jaryqdıodty shamdar qoıylyp, jaryq sapasy artty, júrginshiler men júrgizýshilerdiń qaýipsizdigi jaqsardy jáne energıa tutyný kólemi azaıdy.
"Samal De Luxe" turǵyn kesheniniń syrtqy jaryqtandyrý jumystary da aıaqtaldy. Munda ornatylǵan 664 sham ǵımarattyń sáýlettik ereksheligin aıqyndap, keshki ýaqytta oǵan erekshe kórik berdi.
Nysandardy aralaý barysynda ákim syrtqy jaryq sapasyn arttyrýdyń, zamanaýı ári energıa únemdeıtin tehnologıa engizýdiń mańyzdylyǵyn atady. Sondaı-aq estetıka, fýnksıonaldyq jáne ekologıalyq tıimdilikti ushtastyratyn jaryq júıesin qalyptastyrý qajettigin aıtty. Jaryqtandyrý jelisin jańǵyrtý jumystary aldaǵy ýaqytta da ortalyq kósheler men turǵyn aýdandarda jalǵasady.