15 qyrkúıek kúni elimizde QR Mádenıet jáne aqparat mınıstrligi men "Ulttyq kınony qoldaý memlekettik ortalyǵynyń" uıymdastyrýymen aýqymdy respýblıkalyq "JARQYRA" kastıngi ótti.
Joba búkil Qazaqstandy qamtydy. Kastıng elimizdiń 19 qalasynda bir mezette ótip, otandyq kınematografıa tarıhyndaǵy eń iri sharalardyń biri boldy. Saǵat 11:00-den 19:00-ge deıin mádenıet oshaqtarynda ótken irikteýge 1000-nan astam adam qatysyp, ulttyq kınonyń bir bóligi bolýǵa nıet bildirdi, - dep habarlaıdy Aqshamnews.kz.
Qatysýshylardyń qatarynda oblys ortalyqtarynan bólek, aýdan-aýyldan kelgen turǵyndar da boldy. Bul qazaqstandyqtardyń kıno ónerine degen yqylasyn, joǵary deńgeıdegi qyzyǵýshylyǵyn jáne de shyǵarmashylyq salada ózderin synap kórýge degen umtylysyn kórsetti.
Qatysýshylardyń anketalary Saraptama keńesi tarapynan muqıat zerdelendi. Baǵalaý kezinde akterlik qabilet, sahnalyq obrazdy beıneleý sheberligi jáne kásibı damýǵa degen áleýet eskerildi. Kastıng qorytyndysy boıynsha 705 qatysýshy Kıno ortalyqtyń akterlik bazasyna engizildi.
"Ulttyq kınony qoldaý memlekettik ortalyǵynyń" Basqarma tóraǵasy Qurmanbek Jumaǵalı kastıngke qatysýshylardyń joǵary deńgeıin jáne jobanyń salalyq mańyzyn atap ótti:
“JARQYRA” kastıngi Qazaqstanda qýatty shyǵarmashylyq áleýettiń bar ekenin jáne túrli býyn ókilderiniń kıno salasynda kásibı jumys isteýge daıyn ekenin kórsetti. Ár qatysýshynyń shyǵarmashylyq kózqarasy, tártibi men shynaıy yntasy qýantady. İrikteý ońaı bolǵan joq. Saraptama keńesiniń aldynda kóptegen daryndy úmitkerlerdiń arasynan úzdikterin tańdaý mindeti turdy. Ulttyq kınony qoldaý memlekettik ortalyǵy otandyq kınoındýstrıany damytý, jańa esimderdi ashý jáne olardyń kásibı ósýine jaǵdaı jasaý baǵytyndaǵy júıeli jumystaryn jalǵastyra beredi".
«JARQYRA» jobasy - ulttyq kınony damytýǵa, salanyń kadrlyq áleýetin nyǵaıtýǵa jáne otandyq kınematograftyń órkendeýine úles qosqysy keletin shyǵarmashyl jastardy qoldaýǵa baǵyttalǵan.
Kastıngten ótken qatysýshylardyń anketalary Kıno ortalyǵynyń resmı saıtyna – www.kazakhcinema.kz – ornalastyrylady. Onlaın akterlik baza prodúserler men kınokompanıalarǵa jańa esimderdi ashýǵa, daryndy akterlerdi tabýǵa jáne bolashaq fılmderge shyǵarmashylyq toptar qurýǵa múmkindik beretin zamanaýı quralǵa aınalady.
Aýqymdy «JARQYRA» kastıngi Qazaqstanda ulttyq kınony damytýǵa yntaly, belsendi ári talantty býynnyń ósip kele jatqanyn kórsetti. Ulttyq kınony qoldaý memlekettik ortalyǵy bul bastamany ári qaraı damytyp, jas mamandardyń kásibı jetilýine qoldaý kórsetýdi jalǵastyrady.