Qala ákimi nysandaǵy jumystyń sońǵy kezeńimen tanysty
Almaty ákimi Darhan Satybaldy jumys sapary barysynda «Tuzdybastaý» qosalqy stansıasynyń qurylys nysanyna bardy. Jumys barysy tekserilip, nysandy iske qosý jáne damyp kele jatqan aýmaqtardyń energetıkalyq turaqtylyǵyn qamtamasyz etý jaıy talqylandy.
Qýaty 110/10-10 kV «Tuzdybastaý» qosalqy stansıasy Túrksib jáne Medeý aýdandaryn, sondaı-aq Almaty oblysyna qarasty jaqyn ornalasqan eldi mekenderdi senimdi energıamen qamtý úshin salynyp jatyr. Jobany iske asyrý jańa turǵyn alaptaryn, áleýmettik nysandar men óndiristik aımaqtardy qosýǵa múmkindik beredi, qoldanystaǵy jelilerge túsetin júktemeni azaıtyp, qýat rezervin arttyrady.
«Injenerlik ınfraqurylymdy damytý – qalanyń turaqty ósiminiń negizi. «Tuzdybastaý» qosalqy stansıasy jańa shaǵynaýdandardy úzdiksiz elektrmen qamtýǵa jáne jelilerdiń turaqtylyǵyn arttyrýǵa múmkindik beredi. Eń bastysy, jumysty mejelengen merzimde ári sapaly aıaqtaý», – dedi Almaty ákimi Darhan Satybaldy.
Joba aıasynda: 110/10-10 kV jabyq qosalqy stansıa salyndy; uzyndyǵy 7,8 km bolatyn 110 kV kabel jelisi tartyldy; jalpy uzyndyǵy 14 km-den asatyn 10 kV taratý kabel jelileri júrgizildi.
Nysandaǵy qurylys jumystary aıaqtaldy. Qazirgi ýaqytta jabdyqtardy synaqtan ótkizý jáne iske qosý-retteý jumystary júrgizilýde. «Tuzdybastaý» qosalqy stansıasynyń paıdalanýǵa berilýi Almaty energojúıesiniń turaqtylyǵyn kúsheıtip, jańa aýmaqtardyń bolashaq damýyna qajetti qýat qoryn qamtamasyz etedi.
