Olar bul áreketin erlik dep sanamaıdy.
Almatydaǵy qańtar oqıǵasy kezinde jaralanǵan tártip saqshylaryna kómektesken 19 jastaǵy boıjetken marapattaldy. Ol kóshe boıynan ótip bara jatyp lańkesterdiń soqqysyna ushyraǵan polıseılerdi birden óziniń kóligine mingizip, qaýipsiz orynǵa shyǵarǵan. Terrorısterden tóngen qaýipten qoryqpaı, erlikke barǵan qyzdyń oqıǵasy kópke úlgi, dep habarlaıdy Almaty-akshamy.kz Almaty.tv silteme jasap.
Nazarbaev dańǵylynan sál tómen qaraı, Sátpaev kóshesimen qıylysatyn tus 5 qańtar kúni lańkesterdiń tolyǵymen torýyldaǵan mekenine aınalǵan edi. Dál sol kúni 19 jastaǵy qyz kóligimen osy kósheniń boıymen kele jatady. Keıinnen tártip saqshylarynyń nusqaýymen keri burylypty. "Sol sátte jol boıynda jaralanǵan polıseılerdi kórip, ótip kete almadym", - deıdi keıipker. Jeńil kóliktiń artqy bóligine birden 4 polıseıdi otyrǵyzyp, qaýipti aımaqtan olardy aman alyp shyqqan.
Polına Prosvırına bul áreketin erlik dep sanamaıdy. Nebári 19 jastaǵy boıjetken sol kezdegi tóngen qaýipke qaramastan, batyldyq tanytyp, azamattyq ustanymnyń jarqyn úlgisin kórsetti.
«Bastapqyda qatty qoryqtym. Dese de, tártipsizdik kezindegi quqyq qorǵaý qyzmetkerleriniń eńbegi eren. Jaralylardy kóligime otyrǵyzyp, aýrýhanaǵa aparǵym kelgen. Biraq olar óz basshylarynyń buıryǵymen aýrýhanaǵa emes, basqa mekenjaıǵa aparýymdy surady. Aıtqandaryn oryndap, dittegen jerlerine aman jetkizdim», - dedi qala turǵyny Polına Prosvırına.
Polına oqıǵa ornynda jalǵyz bolmaǵan. Janynda anasy da bolypty. Jaralanǵan tártip saqshylaryn qaýipsiz jerge alyp shyǵarýǵa ol da kómektesken. Elimizge tóngen syn saǵatta kópke úlgi bolarlyq bul isin qalalyq polısıa departamentiniń basshysy Qanat Taımerdenov joǵary baǵalap, olardy marapattady.
«Ol kezde aınalanyń bári dúrbeleńge aınalǵan kez. Joldyń boıynda ýchaskelik polısıanyń mashınalary men qyzmettik kólikter kóp edi. Qyzym kólik tizgininde boldy. Men birtindep tártip saqshylaryn artqy oryndarǵa jaıǵastyrdym. Osylaısha, oqıǵa ornynan tezirek ketip qaldyq», - deıdi qala turǵyny Svetlana Prosvırına.
Oqıǵa kezinde jaralanǵan 4 tártip saqshynyń úsheýi Jetisý aýdandyq polısıa basqarmasynda ýchaskelik polısıa bolyp jumys isteıdi eken. Qyzmetke turǵandaryna da kóp ýaqyt bolmaǵan. 22-24 jas aralyǵyndaǵy jas mamandar. Bólim basshysy qazir olardyń jaǵdaıy birqalypty ekenin, jumysty ári qaraı jalǵastyryp jatqanyn aıtty.
«Árıne, memlekettiń qamqorlyǵynan eshqandaı qyzmetkerimiz shet qalǵan joq. Memleketimiz bizdiń kez kelgen jaraqat alǵan-almaǵany bar, bárine birdeı kómek berip jatyr. Qazir ol úsh qyzmetkerimizdiń jaǵdaılary qalypty, jumystaryn jalǵastyryp jatyr. Ol úsheýiniń jaraqaty asa aýyr emes. Jeńil jaraqat», - dedi Jetisý aýdandyq polısıa basqarmasynyń bólim bastyǵy Janǵazy Seıitqazın.
Aıta keteıik, resmı málimetke sáıkes, qańtar oqıǵasy kezinde Almatyda 1 myńǵa jýyq adam jaralanyp, 11 áskerı qyzmetker qyzmet babynda kóz jumǵan edi. Onyń 9-y – polısıa qyzmetkeri.