Jyl basynda elimizde qańtar oqıǵasy, qaraly qańtar dep oryn alǵan áleýmettik-saıası daǵdarystan keıin talaı shyndyqtyń beti ashylyp, qoǵamda belgili bir dárejede serpilis bolǵany ras. Shyndyq pen aqıqattyń, jaqsylyq pen jamandyqtyń ara jigin ashyp, osy bir keleńsiz dúrbeleńge alyp kelgen qandaı jaǵdaıat ekenin ýaqyt enshisine qaldyra turyp, endigi jerde elimizdiń erteńi qalaı, qaı baǵytta damıdy, toqyraý zamanynyń jaǵymsyz áserlerinen qalaı arylamyz degen saýal búginde árbir qazaqty, árbir qazaqstandyqty tolǵandyrady dep oılaımyn.
Prezıdent Qasym-Jomart Kemeluly Toqaevtyń Jańa Qazaqstan qurý týraly bastamasy der kezinde kóterilgen tarıhı tapsyrmalar men josparlar dep aıtýǵa bolady. 30 jyl boıy qarapaıym halyqtyń kókeıkesti arman-múdesi bolyp kelgen eń ózekti máseleler men ókinishti jaǵdaılar ashyq aıtyldy. Baılar men kedeılerdiń arajigi tym alshaqtap ketkeni, jeń ushynan jalǵasqan paraqorlyq, jeldeı esken jaǵympazdyq, áleýmettik teńsizdik, t.b. ózekti máselelerdi durys sheshý Prezıdenttiń tapsyrmasynda tolyq qamtylǵan eken. Endigi jerde qarapaıym halyqtyń arasynan shyqqan belsendi azamattar, saıası kósh basshylar, zıaly qaýym ókilderi Prezıdenttiń mańaıyna toptasyp, birlese jumys atqarǵandary abzal. Prezıdentke sene de bilýimiz kerek. Senim arta bilýimiz de aýadaı qajet-aq. Álemdegi oryn alyp jatqan túrli saıası oıyndarǵa, qaqtyǵystarǵa durys baǵa bere otyryp, tikeleı arlaspaı, beıtarap baǵyt ustaný abzal bolar edi...
Elimizdiń irgesi shaıqalyp, bolashaǵymyz bulyńǵyr kúıge túsken syn saǵatta Prezıdent Toqaev der kezinde durys sheshim qabyldap, halqyna adal, tabandy, batyl basshy ekenin kórsete bildi. Bir qaýipti kezeńnen halqymyz aman qaldy. Budan bylaı qoldaǵy jetistikterimizdi qadirlep, ótkennen sabaq alyp, Prezıdent mańyna toptasyp, el bolashaǵynyń jarqyn bolýy jolynda naqty ıgilikti ister atqaratyn kez kelgen sıaqty. Ótken jyldarda jiberilgen olqylyqtardy toltyrý jolynda árqaısymyz aıanbaı eńbektenip, ár qazaq óz ulty úshin paıdaly is-sharalardyń júzege asýyna úles qosýymyz kerek.
Birinshiden, burynǵydaı kózboıaýshylyq, ásirese, maqtaý men jaǵympazdyq, jemqorlyq, jershildik, t.b. jaǵymsyz túkke turǵysyz nárselerden birjolata arylýymyz qajet-aq. Naǵyz shynshyl, batyl, ádil sheshim qabyldaıtyn el tizginin ustanǵan belsendi azamattar tobyn qalyptastyrý kerek. Sonda ǵana biz álemdegi órkenıetti elder sapyna qosylamyz.
San ǵasyrlarǵa tamyry jaıylǵan , uly dala tósinde izi saırap jatqan keshegi kóshpendi taıpalar men ulystardyń jıyntyǵynan quralǵan qazaq halqynyń bolashaǵy óte zor dep oılaımyn. Eýrazıa qurlyǵynda ornalasqan Qazaqstan Respýblıkasy, bile bilsek, berisi keshegi Qazaq handyǵynyń zańdy murageri ekenin árbir qazaq maqtan etýimiz qajet. Sonda ǵana ótkenimiz ben búgingi tarıhymyzdy saralap, taldaý jasaý, ásirese, jas urpaq tárbıesi úshin mańyzdy bolaryna sóz joq. Olaı bolsa, aınalaıyn jastar, zamandastar, altyn besik - Qazaq eliniń táýelsizdigi men tynyshtyǵyn qadirleı bileıik, qorǵaı bileıik degim keledi. Eldiń birligi – erteńimizdiń baıandy bolýynyń kepili.